НЕ - ВАЙНЕ!

Тыдзень СМІ

24.05.2015

Інфармацыйная рассылка ГА “Беларуская асацыяцыя журналістаў” 11-24.05.2015 г.

Рэдакцыі некалькіх сайтаў атрымалі з Мінінфармацыі афіцыйныя лісты за подпісам міністра Ліліі Ананіч. Міністр інфармуе пра выяўленыя на рэсурсах «парушэнні заканадаўства аб СМІ» і запытвае звесткі пра юрыдычную ці фізічную асобу ўладальнікаў. У міністэрстве патлумачылі, што гэтыя пасланні не з’яўляюцца пакуль афіцыйнымі папярэджаннямі, але эксперты не выключаюць, што наступным крокам Мінінфармацыі будзе менавіта гэтая санкцыя.

10.05.2015

Інфармацыйная рассылка ГА “Беларуская асацыяцыя журналістаў” 25.04-10.05.2015 г.

Міністр інфармацыі Лілія Ананіч паведаміла, што падрыхтаваны праект указа па прывядзенні заканадаўчых актаў у адпаведнасць з законам “Аб СМІ”. У прыватнасці, там будзе замацавана адказнасць уладальнікаў інтэрнэт-рэсурсаў за каментары карыстальнікаў на форумах. Закон “Аб СМІ”, які набыў моц 1 студзеня 2015 г., прадугледжвае адказнасць усіх уладальнікаў інтэрнэт-рэсурсаў, даступных на тэрыторыі краіны, у тым ліку і замежных – Мінінфарм абяцае жорстка іх кантраляваць.

26.04.2015

Інфармацыйная рассылка ГА “Беларуская асацыяцыя журналістаў” 20-26.04.2015 г.

У ГА “БАЖ” змянілася кіраўніцтва. 24 красавіка ў Мінску адбыўся з’езд арганізацыі. Па выніках галасавання новым старшынём арганізацыі быў абраны юрыст, экс-намеснік старшыні Андрэй Бастунец. Жанна Літвіна, якая кіравала арганізацыяй на працягу амаль 20-і гадоў, заявіла, што не будзе выстаўляць сваю кандыдатуру на галасаванне.

19.04.2015

Інфармацыйная рассылка ГА “Беларуская асацыяцыя журналістаў” 06-19.04.2015 г.

Чарговы штраф журналістцы-фрылансерцы за супрацу з замежным СМІ, чарговы вынятак літаратуры на мяжы, а таксама некалькі новых трывожных інцыдэнтаў, звязаных з інтэрнэт-злачыннасцю. У Гомелі заведзеная крымінальная справа па факце распаўсюду парнаграфіі нібыта з электроннай скрыні гомельскага праваабаронцы,  а ў Лунінцы папулярны інфармацыйны рэсурс “Медиа-Полесье” раптам займеў “двайніка”, які паразітуе на матэрыялах і нават на лагатыпе арыгінала.

06.04.2015

Інфармацыйная рассылка ГА “Беларуская асацыяцыя журналістаў” 23.03-06.04.2015 г.

Прадстаўніца АБСЕ па свабодзе СМІ Дуня Міятавіч адрэагавала на хвалю штрафаў за “незаконны выраб і распаўсюд прадукуцыі СМІ”, а фактычна – за супрацу з замежнымі СМІ без акрэдытацыі. “Улады павінныя спыніць прымяненне абмежавальных захадаў у дачыненні да фрыланс-журналістаў і перастаць перашкаджаць ім спакойна і свабодна выконваць сваю працу”, – заявіла Міятавіч 3-га красавіка. – Канструктыўнае рашэнне гэтага пытання павінна быць дасягнута. Мой Офіс выказвае гатовасць дапамагчы ўладам любымі спосабамі, каб змяніць гэтую разбуральную тэндэнцыю і каб зрабіць магчымым дыялог і супольную дзейнасць урадавых установаў і медыяарганізацый па гэтым пытанні”.

22.03.2015

Інфармацыйная рассылка ГА “Беларуская асацыяцыя журналістаў” 16-22.03.2015 г.

ГА “БАЖ” атрымала афіцыйны адказ з МУС на просьбу даслаць копію прававога акта аб забароне правядзення фота-відэаздымкаў адміністрацыйных будынкаў. Намеснік начальніка галоўнага ўпраўлення аховы правапарадку і прафілактыкі міліцыі грамадскай бяспекі І. Кубракоў паведамляе, што “ў апошні час у краіне мелі месца факты здымкі грамадзянамі, у тым ліку замежнымі, адміністрацыйных будынкаў з мэтай далейшай дыскрэдытацыі органаў дзяржаўнай улады”. І таму прымаюцца меры для прадухілення магчымых пагроз – “ад правакацый да тэрарыстычных актаў”. Далей міліцэйскі чыноўнік даводзіць, што ў праваахоўнікаў ёсць законнае права высветліць, для якіх мэт ажыццяўляецца здымка, а прадастаўленне СМІ ўнутрыведамасных дакументаў, якія прымаюцца МУС, абавязковым не з'яўляецца. Юрыст ГА “БАЖ”, намеснік старшыні арганізацыі Андрэй Бастунец з такой высновай не згодны і кажа пра намер абскарджання гэтага “ўнутрыведамаснага дакумента” ў той частцы, дзе ён тычыцца журналістаў і іншых грамадзян.

15.03.2015

Інфармацыйная рассылка ГА “Беларуская асацыяцыя журналістаў” 02-15.03.2015 г.

Найбольш актыўна ў згаданы перыяд у медыя-асяродку абмяркоўваліся дзве тэмы: вынясенне Міністэрствам інфармацыі пісьмовых папярэджанняў цэламу шэрагу друкаваных СМІ за недакладнасці ў выходных дадзеных, а таксама “ўнутраны дакумент” МУС, які абмяжоўвае фатаграфаванне адміністрацыйных будынкаў па ўсёй Беларусі.

01.03.2015

Інфармацыйная рассылка ГА “Беларуская асацыяцыя журналістаў” 16.02-01.03.2015 г.

Праваахоўныя органы Беларусі працягваюць адсочваць дзейнасць журналістаў-фрылансераў, якія супрацоўнічаюць з замежнымі СМІ. Акрамя таго, вызначылася новая тэндэнцыя – афіцыйныя пісьмовыя папярэджанні недзяржаўным рэгіянальным газетам за дробныя недахопы ў выходных дадзеных. Рэдактары мяркуюць, што гэта робіцца адмыслова з мэтай паставіць іх выданні ў “падвешанае” становішча напярэдадні прэзідэнцкіх выбараў.

15.02.2015

Інфармацыйная рассылка ГА “Беларуская асацыяцыя журналістаў” 09-15.02.2015 г.

Перашкоды пры выкананні прафесійных абавязкаў, пагрозы, адмова яшчэ аднаго дзяржаўнага органа ад адказнасці за блакаванне сайтаў, адхіленне касацыйнай скаргі журналістаў, а таксама зняцце з праваабарончага даклада падазрэнняў у экстрэмізме – вось асноўныя падзеі абазначанага перыяду.

08.02.2015

Інфармацыйная рассылка ГА “Беларуская асацыяцыя журналістаў” 26.01-08.02.2015 г.

Штраф журналістам нібыта за “ўдзел у акцыі”, якую яны асвятлялі; некалькі адмоваў у інфармацыі; агучаная колькасць інфармацыйных матэрыялаў, правераных на экстрэмізм; адказ з двух дзяржаўных ведамстваў наконт блакавання шэрагу сайтаў у снежні ды іншыя навіны.

25.01.2015

Інфармацыйная рассылка ГА “Беларуская асацыяцыя журналістаў” 12-25.01.2015 г.

Першы ў 2015 годзе штраф за супрацоўніцтва з замежным СМІ без акрэдытацыі; некалькі адхіленых журналісцкіх скаргаў; штраф блогерцы за знявагу прадстаўніка ўлады; пакінутае ў сіле папярэджанне недзяржаўнай газеце “Народная воля” ды іншыя падзеі.

11.01.2015

Інфармацыйная рассылка ГА “Беларуская асацыяцыя журналістаў” 05-11.01.2015 г.

Асноўнай падзеяй акрэсленага перыяду стала рэальная пагроза банкруцтва кнігарні “ЛогвінаЎ”, якую суд  аштрафаваў амаль на мільярд рублёў за “незаконную прадпрымальніцкую дзейнасць” – продаж кніг без рэгістрацыі ў Мінінфармацыі. Прыватнае прадпрыемства «ЛогвінаЎ» не было ўключана ў створаны ў 2014 г. дзяржаўны рэестр распаўсюднікаў друкаваных выданняў, хаця цягам года 6 разоў звярталася па адпаведную рэгістрацыю ў Мінінфармацыі.