455

Журналістку Ларысу Шчыракову сёння будуць судзіць за ўдзел у несанкцыянаваным маршы. Яе прэвентыўна затрымалі ўчора

04.09.2020 Крыніца: Служба маніторынгу ГА "Беларуская асацыяцыя журналістаў"

Афіцыйны прадстаўнік УУС Гомельскага аблвыканкама Віталь Прыстромаў паведаміў 4 жніўня карэспандэнту службы маніторынгу ГА "БАЖ", што Ларыса Шчыракова затрыманая супрацоўнікамі Гомельскага РАУС у межах адміністрацыйнай справы аб удзеле ў несанкцыянаваным масавым мерапрыемстве (арт. 23.34 КаАП).

Суд у дачыненні журналісткі прызначаны на 15.00.

30 жніўня Шчыракова вяла стрым са шматтысячнага маршу незалежнасці і міру ў Гомелі. Пасля акцыі журналістку перастрэлі каля яе прыватнага дома людзі ў цывільным і адвезлі ў Гомельскі РАУС. Там ёй зрабілася дрэнна. Шчыракову даставілі ў шпіталь інвалідаў вайны, які знаходзіцца непадалёку ад райаддзела міліцыі, у тым жа Навабеліцкім раёне Гомеля. Журналістка скардзілася на галаўны боль, таму яе шпіталізавалі.

На наступны дзень Шчыракову па яе просьбе выпісалі са шпіталя. Дома заставаўся 13-гадовы сын, якога да таго ж трэба было збіраць у школу.

Суд над Шчыраковай мусіў адбыцца 3 верасня. Аднак напярэдадні журналістцы патэлефанавала сакратарка суддзі Тамары Застаўнецкай з Гомельскага раённага суда і папярэдзіла, што адміністрацыйны пратакол у дачыненні яе вернуты ў РАУС на дапрацоўку — у суд прыязджаць не трэба.

А ўвечары Ларысу Шчыракову затрымалі зноў-такі супрацоўнікі Гомельскага РАУС  і прэвентыўна даставілі ў ізалятар часовага ўтрымання. Непаўнагадовы сын журналісткі не мог патрапіць дадому, паколькі з-за арышту маці застаўся без ключоў.

"Позна ўвечары, — расказвае бабуля хлопчыка Тамара Шчыракова, — міліцыя прывезла ўнука да мяне дадому. Сёння ён не пайшоў у школу, бо да гэтага часу не можам патрапіць у дом". 

Тамара Астапаўна дадала, што збірае дачцэ перадачу, каб паехаць у ізалятар і заадно ўзяць ключы ад дома. Пра суд над дачкой на момант размовы з карэспандэнтам маніторынгу ГА "БАЖ" жанчына яшчэ не ведала.

Самыя важныя навіны і матэрыялы ў нашым Тэлеграм-канале — падпісвайцеся!