369 0

Журналістку-фрылансера Ларысу Шчыракову з Гомеля судзілі паводле чатырох пратаколаў

12.04.2017 Крыніца: Служба маніторынгу ГА "Беларуская асацыяцыя журналістаў"

Гомельскі раённы суд 12 сакавіка разгледзеў ажно чатыры адміністрацыйныя пратаколы супраць журналісткі-фрылансера, сябра ГА “БАЖ” Ларысы Шчыраковай. Два з іх датычныя незаконнага вырабу прадукцыі СМІ без акрэдытацыі (артыкул 22.9 КаАП), яшчэ два — за  няяўку ў міліцыю (артыкул 24.6 КаАП).

У выніку Ларысу Шчыракову аштрафавалі на 41 базавую велічыню: 40 базавых за парушэнне артыкула 22.9 КаАП і адна базавая — за няяўку ў міліцыю па позве.

На выхадзе з будынку Гомельскага раённага суда аштрафаваную журналістку сустрэла прадпрымальніца са словамі: “Гэта вам на штраф. І дзякуй за вашую грамадзянскую пазіцыю!” —  і працягнула Шчыраковай 100 рублёў.

“Судзяць мяне за стрым мітынгу, які зладзілі  на Дзень Волі  ўдзельнікі “Маршу недармаедаў-2” каля Палаца таварыства глухіх. Стрым трансляваў спадарожнікавы тэлеканал “Белсат”. Яшчэ адзін матэрыял, паказаны на “Белсаце”,  называўся “Беларускія бальніцы ставяць вопыты над пацыентамі”. У ім распавядалася, што ва Улукаўскай участковай бальніцы пацыентка засталася  без своечасовай медычнай дапамогі і атрымала інсульт,  а іншыя, малалетнія, — пакутавалі ад зробленых тут прышчэпак.  Мне прыпісваюць, што я злоўжываю  правамі і абавязкамі замежнага журналіста, прадугледжанымі пунктамі 2, 4, 6 артыкула 34 Закона аб СМІ. Спачатку мяне запісалі ў замежныя журналісты, а пасля пералічылі, што я парушыла. Вельмі выйгрышная пазіцыя”, — кажа Шчыракова.

Пратаколы на  журналістку складалі супрацоўнікі  Гомельскага РАУС Ігар Новак і Рустам Цітоў.

У міліцыю Шчыракову выклікалі ў выходныя дні — 25 і 26 сакавіка, калі грамадзяне маюць права на законны адпачынак. За няяўку ў суботу і спазненне ў нядзелю дадаліся  яшчэ два пратаколы на падставе артыкула 24.6 КаАП.

Апроч таго, 25 сакавіка  міліцыя затрымлівала  Шчыракову і  пад прымусам адвезла ў гарадскую пракуратуру, дзе ёй  уручылі афіцыйнае папярэджанне  за супрацоўніцтва  без акрэдытацыі з тэлеканалам “Белсат”, падпісанае намесніцай пракурора Ірынай Макарэвіч.

17 сакавіка  журналістку  судзілі за ўдзел у мірным сходзе “недармаедаў” у Рагачове. Старшыня суда Гомельскага раёна Раіса Кавалевіч аштрафавала Шчыракову на 7 базавых велічынь (161 рубель) нібыта за незаконны выраб прадукцыі СМІ. Гэта без уліку папярэдніх буйных штрафаў, сума якіх перавысіла ў эквіваленце тысячу долараў.

А 13 красавіка, Ларысу Шчыракову выклікаюць у Рэчыцкі раённы суд, дзе будзе разглядацца  яшчэ  адзін адміністрацыйны пратакол паводле часткі 2, артыкулу 22.9 КаАП за сюжэт “Дом «на курыных лапках» у Рэчыцы. Гэта форменнае свінства”.

Склаў пратакол супрацоўнік Рэчыцкага РАУСу Сяргей Жураў, які адмыслова прыязджаў у Гомель 25 сакавіка.  Журналістку чарговы раз  абвінавацілі ў тым, што, не маючы акрэдытацыі, яна апытвала жыхароў дома на вуліцы Войкава  і “тым самым удзельнічала ў падрыхтоўцы і распаўсюдзе прадукцыі СМІ, размясціўшы ў раздзеле “Аб’ектыў” замежнага спадарожнікавага тэлеканала “Белсат”.

Каментары