Паўмарафон праходзіў у польскай сталіцы 26 сакавіка. На забег было зарэгістрававана больш за 10 000 чалавек з розных краін свету. Было шмат і беларусаў. Для журналісткі MOST Таццяны Кулевіч гэта другі варшаўскі паўмарафон і ўпершыню яна была сябрам міжнароднай каманды Amnesty International.
Amnesty International — сусветны рух людзей, якія выступаюць за захаванне і абарону правоў чалавека. Гэты рух зарадзіўся 60 гадоў таму, у 1961 годзе, і да сённяшняга дня да яго далучыліся больш за 10 мільёнаў чалавек у больш чым 150 краінах свету.
— Я вырашыла прабегчы ў майцы з палітзняволенымі журналістамі, бо гэта яшчэ адна магчымасць нагадаць свету пра тое, што адбываецца ў Беларусі. Я бегла за арганізацыю Amnesty International, якая займаецца правамі чалавека ва ўсім свеце і яны ўвесь час сочаць і пішуць пра сітуацыю ў нашай краіне. У Беларусі, дзе правоў у чалавека няма, сёння ў турмах сядзіць каля 1 500 палітвязняў, з якіх 36 прадстаўнікоў медыя.
— Я прымаю ўдзел у шматлікіх забегах з вялікай колькасцю ўдзельнікаў, фатографаў і журналістаў. Нават падчас паўмарафону бегуны чыталі інфармацыю на маёй футболцы і казалі, што яны сочаць за сітуацыяй у Беларусі і перажываюць за нашых палітвязняў. Гэта не будзе такая аднаразовая акцыя ад мяне. Цяпер на кожным забегу я буду нагадваць людзям аб праблемах у Беларусі, — расказала Таццяна.
Зараз журналістка рыхтуецца да чарговага свайго марафону (42 кіламетры), які пройдзе ў красавіку ў польскім Дэмбно.
Чытайце яшчэ:
Галоўнага рэдактара «Рэгіянальнай газеты» перавялі ў жодзінскае СІЗА
«Адчуваецца розніца ў падыходах гісторыкаў і журналістаў». Парады эксперта па працы са складанай тэмай
Тэлеграм-канал журналіста Дзмітрыя Навошы прызналі «экстрэмісцкім»