527

Журналістаў, абвінавачаных па «справе БелТА», ставяць на крыміналістычны ўлік

22.11.2018 Крыніца: Прэс-служба ГА “Беларуская асацыяцыя журналістаў”

Журналістаў партала TUT.BY, абвінавачаных па крымінальнай «справе БелТА», выклікалі ў аддзяленне міліцыі Партызанскага раёна Мінска для пастаноўкі на крыміналістычны ўлік.

Як паведамілі калегі, ніякіх дакументаў у міліцыі не паказалі, але вусна заявілі, што мусяць паставіць іх на крыміналістычны ўлік тэрмінам на 15 гадоў.

Пры гэтым следства па «справе БелТА» яшчэ працягваецца, а журналісты пакуль з’яўляюцца толькі абвінавачанымі, а не асуджанымі.

Як тлумачыць юрыст і былы адвакат Павел Сапелка, крыміналістычны ўлік прымяняецца ўнутранымі органамі для раскрыцця злачынстваў і правапарушэнняў.

Для гэтага ў чалавека бяруць адбіткі пальцаў, узор сліны для аналізу ДНК, фатаграфуюць асобу.

7-9 жніўня ў рэдакцыях TUT.BY, інфармагенцтва БелаПАН, іншых СМІ, а таксама ў кватэрах журналістаў прайшлі вобшукі.

Былі затрыманыя галоўны рэдактар TUT.BY Марына Золатава, рэдактары партала Ганна Калтыгіна, Галіна Уласік і Ганна Ярмачонак, галоўны рэдактар БелаПАН Ірына Леўшына і міжнародны аглядальнік БелаПАН Таццяна Каравянкова, уласны карэспандэнт Deutsche Welle Паўлюк Быкоўскі, рэдактар сайта газеты “Белорусы и рынок” Аляксей Жукаў.

Усе яны правялі некалькі сутак у ізалятары часовага ўтрымання. Пасля вызвалення большасці падазраваных быў забаронены выезд з краіны.

Следчы камітэт абвінавачвае журналістаў у тым, што яны ажыццяўлялі несанкцыянаваны доступ да камп’ютарнай інфармацыі дзяржаўнага інфармагенцтва БелТА. Незалежныя аналітыкі перакананыя: “справа БелТА” — спроба ўладаў запалохаць і ўзяць пад кантроль галоўныя недзяржаўныя інтэрнэт-медыя. Журналістам пагражаюць штрафы і нават турэмныя тэрміны.

Гендырэктару БелТА прапанавалі не даводзіць "справу БелТА" да суда

#StandUpForJournalism — Міжнародная і Еўрапейская федэрацыі журналістаў падтрымалі беларускіх калег

Як людзі па ўсёй краіне стаялі за журналістаў ФОТАПАДБОРКА

Слуцк далучыўся да акцыі “Станем за журналістаў”

Лунінец далучыўся да акцыі “Станем за журналістаў” ФОТАФАКТ

Станем за журналістаў! Далучайся!