952

Журналіста не пусцілі на сесію раённага савета дэпутатаў ў Івацэвічах

28.12.2017 Крыніца: Служба маніторынгу ГА "Беларуская асацыяцыя журналістаў" Сюжэт: Доступ да інфармацыі

Падчас сесіі раённага савета дэпутатаў ў Івацэвічах, што адбывалася 27 снежня, разглядаўся бюджэт Івацэвіцкага раёна на 2018 год, а таксама пытанні пра выкананне планаў сацыяльна-эканамічнага развіцця раёна.

Гэтая тэма цікавіць наведнікаў сайта “Першы Рэгіён”, таму было вырашана накіраваць журналіста Паўла Дайліда, каб азнаёміць чытатчоў з вынікамі сесіі.

“На ўваходзе ў залу пасяджэнняў мяне спыніў намеснік старшыні Івацэвіцкага райвыканкама па ідэалагічнай працы Аляксандр Велікаселец, — кажа сябра ГА “БАЖ” Павел Дайлід. — Чыноўнік чагосьці спалохаўся і запатрабаваў нейкую “акрэдытацыю пры райвыканкаме”. Я патлумачыў, што прыйшоў не ў райвыканкам, а на сесію раённага савета дэпутатаў. У адказ на гэта Велікаселец паведаміў, што сесія ладзіцца сумесна з райвыканкамам, і на ёй будзе выступаць старшыня райвыканкама Аляксандр Грыцук”.

У выніку журналіста “Першага Рэгіёна” на сесію Івацэвіцкага раённага савета дэпутатаў не пусцілі, нягледзячы на тое, што пасяджэнне лічылася адкрытым і пра яе было абвешчана на афіцыйным сайце райвыканкама.

“Я спрабаваў нагадаць чыноўніку, што забараняючы прысутнічаць на ​​сесіі, службовая асоба ігнаруе нормы пункта 4 артыкула 12 Закона “Аб мясцовым кіраванні і самакіраванні ў Рэспубліцы Беларусь”, але мае заўвагі не далі плёну”, — адзначыў Павел Дайлід  і дадаў, што ў іншых месцах (напрыклад, у Брэсце і Ганцавічах) незалежныя журналісты і грамадскія актывісты не маюць праблем з тым, каб браць удзел у аналагічных мерапрыемствах.

Сябра ГА “БАЖ” мяркуе, што ў дзеяннях намесніка старшыні Івацэвіцкага райвыканкама ёсць прыкметы адміністрацыйнага правапарушэння паводле артыкула 22.9 КаАП Рэспублікі Беларусь (а менавіта, парушэнне заканадаўства аб СМІ, якое тычыцца незаконнага абмежавання свабоды масавай інфармацыі), за што прадугледжаны штраф ад 20 да 50 базавых велічынь.

Павел Дайлід спадзяецца атрымаць адказ наконт гэтага інцыдэнту і ад мясцовай улады, і ад пракуратуры.