3049

Журналіста-фрылансера Яўгена Меркіса чакае суд за “незаконны выраб і распаўсюд прадукцыі СМІ”

14.03.2017 Крыніца: Прэс-служба ГА "Беларуская асацыяцыя журналістаў"

На журналіста-фрылансера з Гомеля, сябра ГА “БАЖ” Яўгена Меркіса складзены пратакол за парушэнне артыкулу 22.9 КаАП (“Незаконны выраб і распаўсюд прадукцыі СМІ”).

Яўген Меркіс вёў наўпроставы рэпартаж для тэлеканалу “Белсат” падчас акцыі пратэсту ў Рагачове 12 сакавіка.

14 сакавіка ў РУУСе Савецкага раёна Гомеля на Меркіса быў складзены пратакол паводле артыкулу 22.9 КаАП (“Незаконны выраб і распаўсюд прадукцыі СМІ”). Пратакол складала следчая К. С. Палякова.

Меркісу прадэманстравалі раздрукоўкі з інтэрнэту з яго выявамі, а таксама відэа з трансляцый тэлеканала “Белсат”.

“Фактычна гэты пратакол за незаконнае інтэрв’юіраванне рагачоўцаў”, — гаворыць Яўген Меркес.

Дата судовага паседжання па заведзенай адміністрацыйнай справе пакуль невядомая.

Позву на выклік у Цэнтральны РАУС на 15 сакавіка атрымаў і старшыня Гомельскай філіі ГА “БАЖ” Анатоль Гатоўчыц, які таксама быў у Рагачове ад інфармацыйнай кампаніі БелаПАН падчас нядзельнай акцыі пратэсту.

— У адрозненне ад Яўгена, у мяне пазначана, што выклікаюць у сувязі з адміністрацыйным парушэннем паводле артыкула 23.34 КаАП. А гэта — парушэнне парадку арганізацыі ці правядзення масавых мерапрыемстваў, — распавёў Анатоль Гатоўчыц.

Рэпрэсіі супраць журналістаў у Беларусі ў 2017 годзе (Табліца, абнаўляецца)

Самыя важныя навіны і матэрыялы ў нашым Тэлеграм-канале — падпісвайцеся!