1981

Збіты ў судзе журналіст Павел Дабравольскі абскардзіў накладзены на яго штраф

04.02.2016 Крыніца: Захар Шчарбакоў, БелаПАН Сюжэт: Затрыманні журналістаў

Журналіст партала tut.by Павел Дабравольскі, збіты падчас судовага працэсу па "справе графіцістаў", падаў у Мінскі гарадскі суд скаргу на рашэнне суда Фрунзенскага раёна сталіцы, які аштрафаваў яго на 9,45 млн. рублёў. "Учора мы з юрыстамі падрыхтавалі абскарджанне, і сёння я адвёз яго ў Мінскі гарадскі суд", — паведаміў Дабравольскі БелаПАН 4 лютага.

Напярэдадні журналіст атрымаў матывавальную частку рашэння, згодна з якім суд аштрафаваў яго за дробнае хуліганства, у прыватнасці нецэнзурную лаянку, і непадпарадкаванне законным патрабаванням службовай асобы. У дакуменце фігуруюць паказанні сведак — супрацоўнікаў АМАП, якія заявілі ў судзе, што Дабравольскі на іх "навальваўся ззаду, хапаў за каўнер і цягнуў назад".

Гэтыя паказанні, паводле слоў журналіста, "самая вялікая нестыкоўка ў справе". З іх вынікае, што абвінавачваны здолеў адной рукой утрымаць адразу двух міліцыянераў. "Гэта значыць, адной рукой я здымаў відэа, а другой — схапіў за каўнер і пацягнуў на сябе адразу двух амапаўцаў", — растлумачыў Дабравольскі.

"Гэта абсурднае абвінавачанне, і я не разумею, як суд мог так лёгка выпісаць штраф. Яна (суддзя Марыя Ярохіна. — БелаПАН.) выслухала толькі двух сведкаў-амапаўцаў, хоць у тым пакоі са мной былі Павел Сяргей і Максім Шыцік, якія ўсё непасрэдна бачылі. Іх, вядома ж, не апытвалі, апыталі толькі зацікаўлены бок", — сказаў журналіст. Ён разлічвае на тое, што выяўленыя недакладнасці дапамогуць яму абараніць сваю праўду ў Мінгарсудзе.

Нагадаем, 25 студзеня ў пачатку судовага пасяджэння па "справе графіцістаў" Павел Сяргей і Максім Шыцік разгарнулі расцяжку з надпісам "Не палітычным пераследам". Пры гэтым актывісты крычалі: "Мастацтва не злачынства!" Іх насільна вывелі з залы суда. Разам з імі быў затрыманы Павел Дабравольскі. Адразу пасля затрымання ўсіх траіх збілі ў суседнім пакоі, пасля чаго даставілі ў РУУС, склалі пратаколы аб адміністрацыйных правапарушэннях, а затым прыгаварылі да штрафаў у тым жа судзе Фрунзенскага раёна па арт. 17.1 (дробнае хуліганства) і арт. 23.34 (непадпарадкаванне законнаму патрабаванню службовай асобы) КоАП.

Увечары 25 студзеня Дабравольскі і Шыцік напісалі заяву ў міліцыю на дзеянні супрацоўнікаў АМАП, а на наступны дзень знялі пабоі ў Дзяржаўным камітэце судовых экспертыз. 26 студзеня аддзел інфармацыі і грамадскіх сувязей ГУУС апублікаваў каментар, згодна з якім Павел Дабравольскі "перашкаджаў законным дзеянням супрацоўнікаў міліцыі" і не рэагаваў на іх заўвагі.

1 лютага ў Міністэрства інфармацыі і Генеральную пракуратуру былі перададзены звароты, падпісаныя 182 журналістамі, з патрабаваннем выказаць сваю пазіцыю з нагоды збівання Дабравольскага. Калегі журналіста таксама накіравалі некалькі дзясяткаў такіх зваротаў у МУС, ГУУС Мінгарвыканкама і Вярхоўны суд. У гэтых зваротах, якія адпраўляліся як у электронным, так і ў пісьмовым выглядзе, журналісты просяць дзяржорганы ўстанавіць асобы вінаватых у нападзе супрацоўнікаў міліцыі і прыцягнуць іх да адказнасці.

Следчы камітэт праводзіць праверку па скарзе Дабравольскага на дзеянні міліцыянераў.

Максім Шыцік і Павел Сяргей таксама накіравалі касацыйныя скаргі на пастановы суда Фрунзенскага раёна Мінска аб прыцягненні іх да адміністрацыйнай адказнасці.

БАЖ звярнуўся да спецдакладчыка ААН па свабодзе выказвання

Амаль 200 журналістаў патрабуюць ад Мінінфарма выказаць сваю пазіцыю адносна збіцця калегі

Самыя важныя навіны і матэрыялы ў нашым Тэлеграм-канале — падпісвайцеся!