1237

За асвятленне візіту Святланы Алексіевіч у Капаткевічы будуць судзіць журналістку Шчыракову

03.10.2017 Крыніца: Прэс-служба ГА "Беларуская асацыяцыя журналістаў"

Гомельскую журналістку Ларысу Шчыракову 5 кастрычніка выклікаюць у Петрыкаўскі раённы суд па абвінавачанні ў незаконным вырабе і распаўсюдзе прадукцыі СМІ — нібыта за працу без акрэдытацыі для польскага тэлеканала “Белсат”.

За асвятленне візіту Святланы Алексіевіч у Петрыкаў будуць судзіць журналістку Шчыракову

Гэтым разам за асвятленне візіту Нобелеўскай лаўрэаткі Святланы Алексіевіч ў Капаткевіцкую сярэднюю школу (Петрыкаўскі раён), якую яна скончыла ў 1965 годзе і наведала сёлета ў жніўні.

– Я была шакаваная, калі мне патэлефанавала сакратарка суда і паведаміла пра разгляд адміністрацыйнай справы. Ніхто з тамтэйшай міліцыі мяне не выклікаў і нават не папярэджваў, што складаецца адміністрацыйны пратакол. Зроблена ўсё цішком. Хутка, відаць, і на суд перастануць выклікаць – адразу будуць дасылаць пастановы пра штрафы, – кажа Ларыса Шчыракова.

Журналістка лічыць, што яе адмыслова пераследуюць спецслужбы, каб выжыць з прафесіі. Досыць пільна ставяцца яны і да ўсіх іншых фрылансераў, чые відэаздымкі трапляюць на спадарожнікавы тэлеканал “Белсат” – улады не жадаюць, каб альтэрнатыўныя “карцінкі” пра беларускую рэчаіснасць даходзілі да масавага гледача.

Сёлета Ларысу Шчыракову ўжо пяць разоў прыцягвалі да адміністрацыйнай адказнасці за сюжэты на “Белсаце” і нібыта ўдзел у несанкцыянаваным масавым мерапрыемстве. Агульная сума штрафаў журналістцы перавысіла 3,2 тысячы рублёў.

А ўсяго незалежных журналістаў каралі ў судах Гомельскай вобласці за  супрацоўніцтва з “Белсатам” два дзясяткі разоў: Кастусь Жукоўскі агулам аштрафаваны на 7705 рублёў, Яўген Меркіс і Андрэй Толчын — на 2530 рублёў кожны.

Таксама:

Журналістаў «Белсату» сёння будуць судзіць за рэпартаж пра закрыццё мінскай школы

Штрафы журналістам па арт. 22.9 КаАП 2014-2017 гг.

Гомельскія філія ГА "БАЖ" спрычынілася да сустрэчы Нобелеўскай лаўрэаткі з аднакласнікамі

Рэпрэсіі супраць журналістаў у Беларусі ў 2017 годзе (Табліца, абнаўляецца)