2463

Юрыдычныя аспекты журналісцкай працы абмеркавалі віцебскія і аршанскія БАЖаўцы

13.12.2015 Крыніца: Служба маніторынгу ГА "Беларуская асацыяцыя журналістаў"

На сустрэчу з журналістамі рэгіёна быў запрошаны юрыст Аляксандр Жук. Адбылася зацікаўленая размова пра асаблівасці працы фрыласераў і пра некаторыя аспекты падатковага заканадаўства, якія тычацца журналісцкай дзейнасці. 

Сустрэча прайшла ў Оршы, і з'ехаліся на яе ў асноўным тыя журналісты, хто не працуе ні ў якіх рэдакцыях СМІ. Для іх былі актуальныя аспекты самастойнай журналісцкай працы. Аляксандр Жук патлумачыў, як будуюцца працоўныя адносіны паміж "замоўцам" і "выканаўцам" – рэдакцыяй і журналістам. Потым прысутныя задавалі пытанні "з жыцця" – пра тыя праблемы, з якімі давялося сутыкнуцца пачас працы.

Аляксандр Жук звярнуў увагу на тое, што паняцце “фрыланс” у беларускім заканадаўстве не выкарыстоўваецца. Няпэўнасць юрыдычнага статусу фрылансера непазбежна спараджае пытанні да даходаў аўтара. Тым не менш, пазаштатныя аўтары існавалі здаўна, і таму надзвычай важна ведаць механізмы рэгулявання іх дзейнасці.  

Журналістаў цікавіў шэраг іншых тэмаў: напрыклад, як паводзіць сябе ў выпадку затрымання міліцыяй, як будаваць сваю абарону ў судзе, калі спрабуеш аспрэчыць абвінавачанне ў незаконным вырабе і распаўсюдзе прадукцыі СМІ.

Аршанскія і віцебскія БАЖаўцы акрэслілі кола тэм, на якія было б карысна паразмаўляць з юрыстам і ў далейшым. Аляксандр Жук прапанаваў правесці наступную сустрэчу, на якой абмеркаваць юрыдычныя аспекты блогерства з інтэрнэце,бо гэты від дзейнасці апошнім часам набірае папулярнасць, і варта памятаць пра тое, каб аўтар заставаўся ў бяспецы. Многіх зацікавілі аспекты аўтарскага права, і размова на гэтую тэму з Аляксандрам Жуком таксама плануецца ў перспектыве.

Самыя важныя навіны і матэрыялы ў нашым Тэлеграм-канале — падпісвайцеся!