1075

Яўген Кандратовіч прадставіў фотавыставу пра легендарную музычную пляцоўку Гродна

17.04.2017 Крыніца: Служба маніторынгу ГА "Беларуская асацыяцыя журналістаў"

Гродзенскі фотамайстар, сябра фотаклуба “Гродна” Яўген Кандратовіч прадставіў сваю фотавыставу ў гродзенскай кавярні “Карыца”.

Фотавыстава майстра прысвечаная легендарнай для гродзенцаў музычнай пляцоўцы — Доме культуры імя Грэка. Пляцоўка паўстала спярша як кропка для рэпетыцый некалькіх гродзенскіх гуртоў, а потым стала месцам правядзення нефармальных канцэртаў. За некалькі год з 2009 па 2011 гады ў ДК імя Грэка паспелі выступіць некалькі дзясяткаў музычных гуртоў, таму на здымках з імпрэзы — як музыкі, так і слухачы, што прыходзілі на канцэрты.

Пра выставу распавядае Яўген Кандратовіч:

— Працы ствараліся з 2009 года і па самы апошні канцэрт у ДК імя Грэка. Проста прыходзіў на канцэрты, на нейкія “тусоўкі”, вечарыны, якія мы ладзілі. Усё гэта здымалася. Ужо на самых апошніх канцэртах я вырашыў, што трэба будзе зрабіць фотавыставу. Але ж вырашыў трошкі перачакаць, каб з цягам часу людзям было цікавей глядзець. На фота патрапілі музыкі розных гродзенскіх гуртоў, таксама музыкі з Мінска, госці, што наведвалі канцэрты.

ДК імя Грэка быў зруйнаваны ў 2011 годзе падчас будаўніцтва новай гродзенскай транспартнай развязкі.

Музычным аздабленнем выставы быў гурт “Прощай привычка".

Фота Аляксандра Саенкі

Самыя важныя навіны і матэрыялы ў нашым Тэлеграм-канале — падпісвайцеся!