НЕ - ВАЙНЕ!
191

Яшчэ тры інфармацыйныя рэсурсы ў Брэсцкай вобласці прызнаныя “экстрэмісцкімі матэрыяламі”

23.09.2022 Крыніца: Служба маніторынгу Беларускай асацыяцыі журналістаў

Днямі ў судах Брэсцкай вобласці адбыліся пасяджэнні, па выніках якіх атрымаў дадатак адмысловы “Рэспубліканскі спіс экстрэмісцкіх матэрыялаў”. Хаця тэлеграм-каналы названыя ў адпаведным рэестры "чатамі".

Як паведамляе “Берасцейская Вясна”, 20 верасня ў Лунінцы суддзя Кацярына Клеўжыц па запыце мясцовай пракуратуры прызнала “экстрэмісцкімі матэрыяламі” Telegram-чат з назвай "Media-Polesye.by", які мае ідэнтыфікатар https://t.me/mediapolesye . Аднак на самой справе па згаданай спасылцы існуе не чат, а канал у месенджары Telegram.

За дзень да гэтага, 19 верасня, у Бярозе суддзя Наталля Мінчанка па запыце пракурора Аляксандра Круцько вырашала аналагічнае пытанне наконт Telegram-чата з назвай "Žyžal", які мае ідэнтыфікатар https://t.me/Zhyzhal  і ідэнтыфікатар (ID), што змяшчае паслядоўнасць лічбаў 1660639194. У гэтым выпадку таксама па спасылцы ёсць Telegram-канал, але не чат.

На мінулым тыдні, 15 верасня, суддзя Сяргей Кухацкавалец у Івацэвічах паводле ініцыятывы мясцовага пракурора Рамана Гузюка прызнаў “забароненым” Viber-чат з назвай "1RegBY". Як адзначаюць праваабаронцы з “Берасцейскай Вясны”, з такой назвай ёсць незалежнае выданне “Першы рэгіён”, а вось знайсці ў месенджары Viber адкрытых чатаў з аналагічнай назвай пакуль не атрымалася.

Усе тры згаданыя інтэрнэт-рэсурсы на раніцу 22 верасня 2022 года ўжо трапілі ў “Рэспубліканскі спіс экстрэмісцкіх матэрыялаў”.

Чытайце яшчэ:

«Падчас практыкі давалі пісаць выключна пра заблукаўшых у лесе і тапельцаў»: з якімі праблемамі сутыкаюцца пачаткоўцы-журналісты

"Гэта наш агульны еўрапейскі выклік". Беларускія праваабаронцы ўзялі ўдзел у акцыі салідарнасці з Украінай

Парламент Літвы забараніў прапагандысцкія беларускія тэле- і радыёпраграмы. Мінкульт абурыўся

Самыя важныя навіны і матэрыялы ў нашым Тэлеграм-канале — падпісвайцеся!