НЕ - ВАЙНЕ!
538

Вобшукі ў магілёўскіх журналістаў

14.01.2022 Крыніца: Прэс-служба Беларускай асацыяцыі журналістаў

Раніцай 14 студзеня сілавікі прыйшлі з ператрусамі да магілёўскіх журналістаў і ў офіс рэдакцыі сайта “Магілёўскі рэгіён”. Ператрусы правялі ў Барыса Вырвіча, Яўгена Глушкова і Алеся Сабалеўскага. Яны праходзяць як сведкі па крымінальных справах. Пасля журналістаў забралі на допыт.

Да Барыса Вырвіча прыйшлі а 6.20 раніцы супрацоўнікі крымінальнага вышуку аддзела ўнутраных спраў Магілёўскага аблвыканкама.

У пастанове на ператрус згадваліся чатыры артыкулы Крымінальнага кодэкса: ч. 3 арт. 188 (Паклёп), ч.1 арт. 203-1 (Незаконныя дзеянні ў дачыненні інфармацыі аб прыватным жыцці і персанальных дадзеных), арт. 361-1 (Стварэнне экстрэмісцкага фармавання альбо ўдзел у ім) і арт. 369 (Абраза прадстаўніка ўлады). Паводле дакумента, Барыс Вырвіч праходзіць па іх у якасці сведкі.

Спачатку ператрус правялі ў бацькоўскім доме Барыса ў Бялынічах, дзе зараз пражывае журналіст. Забралі два ноўтбукі, смартфон, флэш-карткі, нататнікі, паперы з працоўнымі запісамі і 40 рублёў. Пасля паехалі ў кватэру па месцы яго рэгістрацыі, але там сілавікі не знайшлі нічога цікавага для сябе. Потым Вырвіча дапыталі ў Бялыніцкім РАУС як сведку.

Да журналістаў-фрылансераў Яўгена Глушкова і Алеся Сабалеўскага следчыя прыйшлі ў суправаджэнні ўзброеных байцоў АМАП.

У відэааператара Яўгена Глушкова забралі два ноўтбукі, смартфон і дзве відэакамеры. Падчас вобшуку сілавікі пагражалі Яўгену, што адвязуць у ізалятар, калі ён не назаве пароль ад свайго тэлефона. Копію пратакола ператрусу не выдалі. Пасля Яўгена Глушкова адвезлі ва УУС Магілёўскага аблвыканкама, дзе дапыталі ў якасці сведкі па крымінальнай справе пра паклёп (арт. 188 КК).

Алесю Сабалеўскаму АМАПАаўцы адразу пачалі пагражаць, што ўзламаюць дзверы ў кватэру і прыменяць спецсродкі. Калі журналіст адчыніў, яго паклалі на падлогу: тварам уніз, рукі за галаву. У выніку ператрусу з яго кватэры забралі два сістэмныя блокі камп’ютараў, смартфон, відэакамеру і носьбіты інфармацыі. Пасля Сабалеўскага таксама даставілі ва УУС Магілёўскага аблвыканкама на допыт як сведку па крымінальнай справе пра паклёп (арт. 188 КК).

Пазней у гэты ж дзень адбыўся чарговы ператрус у рэдакцыі інфармацыйнага сайта “Магілёўскі рэгіён” (6tv.by). У офісе нікога не было — журналісты выдання выехалі з Беларусі. Сілавікі ўзламалі дзверы ў памяшканне, усё там перавярнулі, забралі тэхніку.

Напярэдадні, 5 студзеня, рашэннем суда Ленінскага раёна Магілёва інтэрнэт-рэсурс “Магілёўскі рэгіён” быў прызнаны экстрэмісцкім. Мінінфарм унёс яго ў адпаведны спіс экстрэмісцкіх матэрыялаў.

Самыя важныя навіны і матэрыялы ў нашым Тэлеграм-канале — падпісвайцеся!