221

Віцебскую блогерку таксама будуць судзіць за заклікі ў сацыяльных сетках

15.01.2020 Крыніца: Служба маніторынгу ГА "Беларуская асацыяцыя журналістаў"

Блогерка Алена Янушкоўская атрымала міліцэйския пратаколы, складзеныя на яе за распаўсюд інфармацыі пра акцыю ў патрымку незалежнасці Беларусі. Блогерку  вінавацяць у парушэнні заканадаўства аб масавых мерапрыемствах паводле артыкула 23.34 КаАП.

Паводле міліцыянтаў, яна нібыта заклікала на несанкцыянаваную  акцыю, якая адбылася 29 снежня ў Віцебску, — у той дзень каля пятнаццаці жыхароў Віцебска сталі “жывым ланцугом” уздоўж плошчы Перамогі і склалі з надрукаваных на папяровых аркушах літар слова “Незалежнасць”. Хтосьці з іх яшчэ трымаў бел-чырвона-белыя сцягі, афіцыйны дзяржаўны сцяг Рэспублікі Беларусь і плакаты.

Алену Янушкоўскую вінавацяць у тым, што яна размясціла заклікі да ўдзелу ў акцыі, арганізатары якой не атрымалі дазволу на правядзенне ў раённых уладаў. Супрацоўнікі аддзела міліцыі Віцебскага раёна, як вынікае з пратакола, заўважылі іх “падчас маніторынгу сеткі Інтэрнэт” у групе “Настоящая Беларусь” в Facebook.   

Групы пад такой назвай, заснаваныя жыхаркай вёскі Суйкава Віцебскага раёна Аленай Янушкоўскай, існуюць у розных  сацыяльных сетках і  месенджарах. Самым першым сеткавым рэсурсам з такой назвай стаў відэаблог “Настоящая Беларусь”, у ім Алена распавядае “пра Беларусь, якую не паказваюць па тэлевізары”. Яна пачала з выкрыцця праблем у роднай вёсцы, і мясцовыя чыноўнікі былі вымушаны займацца іх  вырашэннем. Паступова відэаблог набраў папулярнасць, і з яго дапамогай стала магчымым змагацца з камунальнымі і сацыяльнымі недахопамі ў маштабе раёна і нават вобласці.

Дата суда “за заклікі” ў сацыяльных сетках пакуль невядомая, але 21 студзеня Алену Янушкоўскую будуць судзіць за ўдзел у той самай акцыі 29 снежня. 9 студзеня блогерку ўжо аштрафавалі за ўдзел у мінскіх акцыях пратэсту супраць паглыбленай інтэграцыі: за гэта яна мусіць сплаціць два штрафы па 810 рублёў кожны.

Нагадаем, адміністрацыйную справу “за заклікі” ў інтэрнэце да ўдзелу ў акцыі падтрымкі незалежнасці Беларусі  распачалі і супраць жыхаркі Віцебска Наталлі Спірыдонавай.

Самыя важныя навіны і матэрыялы ў нашым Тэлеграм-канале — падпісвайцеся!