Каляндар

Вечарына пісьменнікаў Падляшша Надзеі Артымовіч і Міхала Андрасюка

10.05.2019 278
Дэдлайн Пачатак Назва Арганізатар
10.05.2019 15.05.2019 18:30 Імпрэза пісьменнікаў Міхала Андрасюка і Надзеі Артымовіч

15 мая ў Літаратурным музеі Максіма Багдановіча — творчая сустрэча з пісьменнікамі беларускага Падляшша.

У выдавецкай серыі праграмнай рады тыднёвіка беларусаў Польшчы "Ніва" з'яівілася важкае папаўненне: дзвюхмоўнае выданне вершаў Надзеі Артымовіч "Краявід з невідочнай памылкай" (у арыгінале і ў перакладзе на польскую мову Марціна Рэмбача) і новая кніга прозы Міхала Андрасюка "Поўня". 15 мая ў Літаратурным музеі Максіма Багдановіча гэтыя дастаткова рэдкія ў нашых кнігарнях выданні будуць прадстаўленыя на імпрэзе з удзелам аўтараў і рэдактараў.

Перад слухачамі выступяць празаік, старшыня ГА "Саюз беларускіх пісьменнікаў" Барыс Пятровіч, празаік Міхал Андрасюк, выдавец, галоўны рэдактар тыднёвіка "Ніва" Яўген Вапа.

Урэшце дачакаліся. Пасля доўгага зацішша перад Чытачамі неверагодна таямнічая «Поўня» Міхала Андрасюка. Літаратура бязмежная ў сваёй лёсавызначальнасці часу і прасторы. Сваімі вобразамі і словамі выспявала стагоддзямі ў магічным свеце Белавежскай пушчы і ўзляцела звыш межаў жыцця і смерці. Чытаўшы гэтую кнігу мы можам на хвіліну адчуваць сябе ў некалькіх вымярэннях, але без патрэбы ставіць лішнія пытанні наконт свету бачанага і небачанага. Поўня празаічнага таленту Міхала Андрасюка раскрываецца перад намі. 

Яўген Вапа. Доўгі Брод 

Міхал Андрасюк нарадзіўся 2 снежня 1959 года ў Гайнаўцы на Падляшшы. Дзяцінства і маладосць правёў у вёсцы Войнаўка ў гміне Дубічы-Царкоўныя, дзе і зараз пражывае. Скончыў беларускі ліцэй у Гайнаўцы (1978), працаваў настаўнікам і каменячосам, супрацоўнічае з Беларускім Радыё Рацыя. Дэбютаваў у беластоцкай «Ніве» (1979) вершамі. У гэтым выданні друкуецца і надалей. Піша па-беларуску і па-польску. Аўтар кніг прозы «Фірма» (Беласток, 2000), «Мясцовая гравітацыя» (Беласток, 2004), «Белы конь» (Беласток, 2006, перакладзены і выдадзены на польскай мове ў 2011), «Вуліца Добрай Надзеі» (Мінск, 2010), «Wagon drugiej klasy» (Беласток, 2010), «Krzyżyk» ( Беласток, 2015). Міхал Андрасюк узнагароджаны «Залатым апострафам» часопіса «Дзеяслоў» за сваю прозу, якая друкавалася на яго старонках у 2009 годзе. Атрымаў літаратурную прэмію прэзідэнта горада Беластока імя Веслава Казанэцкага за 2011 год за кнігу «Белы конь».

Надзея Артымовіч нарадзіўся 18 лютага 1946 года ў Аўгустове, Бельскага павету. Дзяцінства паэткі прайшло ў Бельску-Падляшскім, тут яна хадзіла ў пачатковую школу і Беларускі агульнаадукацыйны ліцэй імя Тарашкевіча. У 1965-67 вывучала рускую філалогію на настаўніцкіх курсах у Беластоку, а ў наступныя гады — беларускую філалогію ў Варшаўскім універсітэце, які закончыла ў 1972. Пасля жыла і працавала (у т.л. перакладчыцай) у Варшаве. Сябра Саюза польскіх пісьменнікаў з 1986. На пенсіі, жыве ў Бельску-Падляшскім. Аўтарка кніг «We śnie w bólu słowa» (1979), «Роздумы» (1981), «Сезон у белых пейзажах» (1990), «З неспакойных дарог» (1993), «Дзверы» (1994, разам з Алесем Разанавым), «Лагодны час» (1998), «Адплывае спакойнае неба» (1999) і інш.

Месца: Літаратурны музей Максіма Багдановіча
Час: 18.30
Уваход вольны!