2368

У Мінску старшыня камісіі прыгнаў грузавік, каб перашкодзіць зняць выбары на відэа

13.10.2015 Крыніца: "Наша Ніва" Сюжэт: Доступ да інфармацыі

 

Карэспандэнт партала Tut.by Валянцін Міхальцоў апісаў абсурдную сітуацыю, якая здарылася падчас выбараў на сталічным участку.

«У выбарчага ўчастка №18 у Цэнтральным райне ёсць яшчэ адзін важны плюс. У будынку, дзе ён размешчаны, няма устаноў, якія працуюць у нядзелю. Гэта значыць усе тыя, хто ўвайшлі ў будынак, ішлі толькі на ўчастак. Значыцца, можна было зафіксаваць на відэа колькасць выбаршчыкаў на працягу дня галасавання. У выпадку прыпісак, укідаў і «каруселяў» гэта відэа магло паслужыць аб'ектыўным доказам.

Я размясціў відэакамеру ў сваёй машыне на паркоўцы насупраць уваходу на ўчастак. Прыйшоўшы раніцай, я ўключыў запіс і пайшоў на ўчастак. Апоўдні я ўбачыў, што роўна перад маёй машынай стаіць грузавік і закрывае агляд. Пры гэтым месцаў на паркоўцы было дастаткова. Кіроўца грузавіка моўчкі выставіў знак аварыйнага прыпынку і паклаў пад шкло запіску «Зламаны». На просьбу хаця б адкаціць машыну і даць выехаць, ён проста сышоў у будынак Мінскай шпалернай фабрыкі, у якім і знаходзіўся ўчастак.

 Выкліканыя на месца аўтаінспектары вызначылі прыналежнасць грузавіка. Гэта быў транспарт шпалернай фабрыкі. Пачалі разбірацца — высветлілі, што заказчыкам блакавання быў старшыня выбарчай камісіі, адзін з кіраўнікоў фабрыкі — Сяргей Лузін. Ён растлумачыў, што заўважыў відэакамеру і даручыў кіроўцу перапыніць здымку з дапамогай грузавіка.

Па патрабаванні інспектара ДАІ «зламаны» грузавічок без праблем ад'ехаў, кіроўцу цяпер пагражае штраф за няправільную паркоўку. Але мэта была дасягнута — відэафіксацыю яўкі мы правесці не змаглі. Для аб'ектыўнасці патрабаваўся бесперапынны запіс, а не з паўтарагадзіннай паўзай.