1759

У Ігара Логвінава забралі літаратуру на мяжы

10.04.2015 Крыніца: Прэс-служба ГА "Беларуская асацыяцыя журналістаў" Сюжэт: Барацьба з экстрэмізмам

На беларуска-літоўскай мяжы ў выдаўца Ігара Логвінава забралі 20 асобнікаў зборніка філасофскіх артыкулаў і дакладаў выкладчыцы Еўрапейскага гуманітарнага ўніверсітэта Таццяны Шчытцовай «Антрапалогія. Этыка. Палітыка».

 


Выява з сайта Радыё "Свабода"

Як распавёў прэс-службе ГА “БАЖ” Ігар Логвінаў, выпадак адбыўся 9 красавіка на мытным пераходзе Каменны Лог. Выдавецтва “ЛогвінаЎ” да кнігі дачыненні не мела – яе выпусціў ЕГУ, а Ігара Логвінава проста папрасілі захапіць 20 асобнікаў і завезці на прэзентацыю ў Мінску.  

Падставай для вынятку кнігі стала падазрэнне, што яна можа нанесці шкоду дзяржаўным інтарэсам Рэспублікі Беларусь. Па словах І. Логвінава, мытнікі доўга гарталі яе і ў выніку вырашылі затрымаць. Па іх словах, цяпер на мытні ўведзены “больш жорсткі рэжым” адносна інфармацыйнай прадукцыі. Быў складзены акт адбору проб і ўзораў. Ігару Логвінаву сказалі, што ён можа тэлефанаваць на мытню, каб даведацца пра далейшы лёс кніг.     

Аўтарка кнігі Таццяна Шчытцова ў гутарцы з Радыё “Свабода” выказала здагадку, што ўвагу мытнікаў прыцягнуў раздзел кнігі “Філасофія і палітыка” – у ім некалькі тэкстаў было прысвечана прэзідэнцкім выбарам у Беларусі 2006 і 2010 гадоў.