1930

У Гродне — выстава беларускага плакату

07.03.2017 Крыніца: Андрэй Мялешка для baj.by

Некалькі дзесяткаў плакатаў, што прадстаўляюць Беларусь розных часоў, можна пабачыць на выставе ў гродзенскім Цэнтры гарадскога жыцця. Куратар выставы "Беларускі плакат: візуальны код часу" — старшыня Беларускага саюза дызайнераў Дзмітры Сурскі.

— Выстава — частка буйнога праекта. Мы ствараем лічбавы архіў па беларускім плакаце, пачынаючы з першых, якія ствараліся як афішы яшчэ ў царскія часы, і па сённяшні дзень, — распавёў Дзмітры Сурскі. — Сучасныя плакаты шырока вядомыя ў свеце дзякуючы буйным міжнародным конкурсам, якія адбываліся з пачатку 1990-х гадоў. На трыенале ў Тайямо былі дасланыя ад балога Савецкага Саюзу больш за 100 плакатаў, адабраныя 20, а з іх 12 былі беларускія. У нас ужо сабраная калекцыя з больш чым 1000 плакатаў у лістах. Зараз спрабуем дамовіцца з Расіяй і знайсці плакаты міжваеннага перыяду, якія падчас эвакуацыі былі звезеныя ў Расію і недзе там засталіся.

Вынікам вяліка праекту будзе стварэнне лічбавага архіву, сайта. Можна будзе шукаць плакаты па назвах, па аўтарах, па тэгах. Таксама павінна з’явіцца кніга. Яе прэзентацыя запланаваная на травень.

Кіраўнік Цэнтра гарадскога жыцця, сябра Беларускай асацыяцыі журналістаў Павал Мажэйка мяркуе, што гэтыя плакаты — адметная частка гісторыі.

“Перш за ўсё, гэта — гісторыя маёй Радзімы, Беларусі. Праз плакаты, праз творчасць, хай сабе часта заідэалагізаваных мастакоў, дызайнераў, творцаў, хай праз тую палітычную сітуацыю, у якой яны працавалі, але мы бачым гісторыю Беларусі. Паказаныя розныя праблемы людзей. Можна ўбачыць, як творцы спрабавалі гэта падаць, напэўна, каб не “ціснуць сабе на горла”, не патаптаць свае прынцыпы, а ў той жа час зрабіць нешта мастацкі вартае. Бачым, што ёсць беларуская школа плаката — яна была і ў савецкія часы, за “польскім часам” і ў перыяд Расійскай імперыі. Плакат — гэта адзін з такіх відаў ці жанраў мастацтва, якім мы маем права ганарыцца.

На адкрыццё выставы, што будзе працаваць з 7 па 31 сакавіка 2017 года, завіталі гродзенскія мастакі, выкладчыкі гарадзенскага каледжа мастацтваў, а таксама фатографы і журналісты розных СМІ рэгіёна.

Самыя важныя навіны і матэрыялы ў нашым Тэлеграм-канале — падпісвайцеся!