327

У Драгічыне міліцыя праводзіць праверку наконт допісу ў мясцовай групе ў Viber

14.02.2019 Крыніца: Служба маніторынгу ГА "Беларуская асацыяцыя журналістаў"

Супрацоўнікі Драгічынскага РАУС ладзілі праверку паводле публікацыі ў Viber-супольнасці “Реальный Дрогичин” на падставе заявы, што паступіла ў праваахоўныя органы.

У скарзе паведамлялася, што ў гэтай групе з’явілася ілюстрацыя з крытычным подпісам на адрас ураду (дарэчы, незразумела якой краіны). Як паведаміў адзін з адміністратараў суполкі “Реальный Дрогичин”, міліцыянты цікавіліся асобай аўтара згаданай публікацыі.

“Я патлумачыў, што не знаёмы з гэтым чалавекам і прапанаваў супрацоўнікам звярнуцца да ўладальнікаў Viber, паколькі ў Viber-супольнасцях няма функцыяналу, які дазваляе паглядзець нумар тэлефона таго ці іншага чалавека. У цэлым сітуацыя выглядае недарэчнай, бо міліцыі даводзіцца адцягваць свае сілы ад барацьбы з сапраўдным крыміналам на вось такую заяву”, — распавёў суразмоўца.

На сёння міліцыя не здолела знайсці аўтара допісу, таму праверка па заяве не завершана.

Viber-супольнасць “Реальный Дрогичин” налічвае больш за тысячу ўдзельнікаў. Кожны дзень там размяшчаецца шмат разнастайнай інфармацыі — на тэмы ад вырошчвання маліны ў рэгіёне да падзей у Венесуэле — і адбываюцца гарачыя дэбаты.

Для многіх жыхароў паведамленні ў гэтай вайбер-супольнасці з’яўляюцца альтэрнатыўнай крыніцай мясцовых навін, бо ў раёне існуюць толькі дзяржаўныя сродкі масавай інфармацыі: газета “Драгічынскі веснік” і тэлекампанія “Общественное Дрогичинское телевидение”.