292

У Брэсце затрыманы журналіст Алег Супрунюк

07.07.2021 Крыніца: Прэс-служба ГА "Беларуская асацыяцыя журналістаў" Сюжэт: Барацьба з экстрэмізмам

Рэдактар ​​навін сайта "Першы Рэгіён" Алег Супрунюк затрыманы ў Брэсце 6 ліпеня. Пра гэта паведамляе выданне.

Па словах жонкі Алега Пятровіча, мужа прыкладна ў 22:20 забралі з дома супрацоўнікі міліцыі. Калі яго звезлі, яна спрабавала даведацца, дзе яе муж і ў чым яго вінавацяць. Ёй паведамілі, што знаходзіцца ў Ленінскім РАУС Брэста, затрыманы. Па якой прычыне затрыманы журналіст, участковы не сказаў, растлумачыў, што не мае права гаварыць.

7 ліпеня стала вядома, што рэдактара навінаў Алега Супрунюка вінавацяць у вырабе і распаўсюдзе экстрэмісцкіх матэрыялаў (арт. 19.11 КаАП). Яго даставілі ў суд Ленінскага раёна Брэста. Справа тычыцца падрыхтоўкі журналісцкага матэрыялу, фотаздымак у якім раней быў прызнаны экстрэмісцкім.

Цяпер Супрунюку пагражае вялізны штраф альбо адміністрацыйны арышт.

Прызнанне журналісцкіх матэрыялаў экстрэмісцкімі і прыцягненне калег да адказнасці — адна з найбольш вострых праблем у сферы медыя цяпер у Беларусі.

Алег Супрунюк — сябра Беларускай асацыяцыі журналістаў, некаторы час узначальваў яе брэсцкую суполку. Працаваў у газеце “Брестский курьер” і іншых выданнях. Цяпер — рэдактар ​​навін сайта "Першы Рэгіён". 

Самыя важныя навіны і матэрыялы ў нашым Тэлеграм-канале — падпісвайцеся!