365

Супрацоўнікі міліцыі даслалі аднолькавыя адказы на дзве розныя скаргі журналісткі Аліны Скрабуновай

04.06.2018 Крыніца: Служба маніторынгу ГА "Беларуская асацыяцыя журналістаў"

Часова выконваючы абавязкі намесніка начальніка аддзела Ленінскага РАУС Магілёва Аляксандр Пушын даслаў Аліне Скрабуновай два аднолькавыя адказы на дзве розныя скаргі, якія журналістка накіравала 23 мая на імя начальніка РАУС Аляксея Шчэрбакова.

https://baj.by/sites/default/files/event/preview/alina_skrabunova.jpg

“Першая мая скарга тычылася інцыдэнту на выходных, калі невядомыя людзі, якія прадставіліся супрацоўнікамі міліцыі, ламіліся ў кватэру, калі мяне там не было, і апытвалі суседзяў наконт мяне. Другая скарга тычыцца затрымання ў панядзелак, 21 траўня. Тады я папярэдне размаўляла з участковым і мы дамовіліся, што ён ператэлефануе мне ў аўторак. Аднак мяне схапілі ў цёмным пад’ездзе, паводзілі сябе па-хамску, што ніяк не суадносіцца з органамі правапарадку. Да таго ж я хачу даведацца, чаму другі чалавек, які затрымліваў мяне з участковым Марозавым, не назваў сябе”, – распавядала раней Аліна Скрабунова карэспандэнту службы маніторынгу ГА “БАЖ”.

У абсалютна аднолькавых па тэксце адказах за нумарамі С-313 і С-314 на дзве розныя скаргі Аляксандр Пушын паведаміў Скрабуновай, што яе скаргі “пакінуты без разгляду па істоце”, у сувязі з тым, што ўтрымліваюць пытанні, рашэнне якіх не адносіцца да кампетэнцыі Ленінскага РАУС Магілёва.

Пасля гэтага Пушын распавёў журналістцы пра законнасць дзеянняў супрацоўнікаў праваахоўных органаў падчас брутальнага затрымання і паведаміў, што яна можа паскардзіцца на міліцыянтаў у пракуратуру альбо Следчы камітэт.

Па словах Аліны Скрабуновай, зараз яна кансультуецца з юрыстамі і праваабаронцамі. 4 чэрвеня журналістка збіраецца падаць скаргу на дзеянні супрацоўнікаў праваахоўных органаў у пракуратуру.

Праваабаронца Барыс Бухель лічыць, што супрацоўнікі Ленінскага РАУС Магілёва даслалі на скаргі Скрабуновай адпіскі, каб можна было адсправаздачыцца, што яны нейкім чынам на іх адрэагавалі.