НЕ - ВАЙНЕ!
760

Суд у Менску пакараў фатографа Уладзя Грыдзіна арыштам на 13 сутак

07.02.2022 Крыніца: "Радыё Свабода"

У судзе Фрунзэнскага раёну Менску разгледзелі справу Уладзя Грыдзіна паводле артыкулу 24.3 «Непадпарадкаваньне законнаму распараджэньню або патрабаваньню службовай асобы пры выкананьні ёй службовых паўнамоцтваў».

Судзьдзя Тацяна Палулех вынесла вырак — 13 дзён арышту.

Фатографа абвінавацілі ў тым, што 4 лютага 2022 падчас правядзеньня ператрусу па вуліцы Ігнатоўскага ён нібыта «не падпарадкаваўся законным распараджэньням супрацоўніка ГАУС Менгарвыканкаму Сазонава, не пускаў у кватэру».

У міліцыянтаў была пастанова на правядзеньне ператрусу, выпісаная 24 студзеня. У матэрыялах справы таксама ляжыць пастанова на правядзеньне ператрусу ў крымінальнай справе нумар 201 21 11 02 02. Гэтая вялікая справа, якая знаходзіцца ва ўпраўленьні Сьледчага камітэту па Менску (сьледчы Дзягцевіч).

Згаданая справа тычыцца «масавых беспарадкаў», у ёй каля тысячы падазраваных.

Як паведамілі сваякі, Уладзь перастаў выходзіць на сувязь з абеду пятніцы 4 лютага. Толькі 6 лютага яны даведаліся, што Грыдзіна схапілі і ўтрымліваюць у ІЧУ на Акрэсьціна. Сваякі паехалі да яго дадому і пабачылі сьляды ператрусу — рэчы раскіданыя, на падлозе сьмецьце, няма ноўтбука і фотаапарата. На дзьвярах — у пакоі і на ўваходных — вісеў сьвежа прыклеены стыкер з напісаным нумарам тэлефона адваката.

Уладзь Грыдзін працаваў фотакарэспандэнтам Радыё Свабода, пакуль 29 жніўня 2020 году ўлады не пазбавілі акрэдытацыі яго і яшчэ траіх нашых журналістаў.

У верасьні 2020 году Грыдзіна затрымалі падчас выкананьня журналісцкіх абавязкаў і адседзеў 11 дзён у турме на Акрэсьціна.

Уладзь быў пераможцам і прызэрам конкурсу Belarus Press Photo, яго здымкі публікавалі сусьветныя агенцтвы і СМІ.

Самыя важныя навіны і матэрыялы ў нашым Тэлеграм-канале — падпісвайцеся!