1434

Суд у Магілёве зноў стаў на бок журналіста Лапцэвіча

07.06.2017 Крыніца: Служба маніторынгу ГА "Беларуская асацыяцыя журналістаў"

Журналіст Уладзімір Лапцэвіч здолеў дамагчыся ў судзе, каб была адменена міліцэйская пастанова аб спыненні справы аб адміністрацыйным правапарушэнні ў адносінах да чыноўніка Адміністрацыі Ленінскага раёна г. Магілёва Канстанціна Кісцянёва.

 

Суддзя суда Ленінскага раёна г. Магілёва В. Палякова 5 чэрвеня разгледзела скаргу Лапцэвіча на пастанову аб спыненні справы аб адміністрацыйным правапарушэнні ад 23.05.2017 года, вынесеную ўчастковым інспектарам Ленінскага РАУС г. Магілёва А. Емельяненка.

Нагадаем, 29 красавіка ў будынку Адміністрацыі Ленінскага раёна Магілёва павінен быў адбыцца ініцыяваны раённымі ўладамі сход членаў гаражнага кааператыва “Спадарожнік-2008.

Члены кааператыва запрасілі для асвятлення мерапрыемства журналіста БелаПАН Уладзіміра Лапцэвіча, аднак той на пасяджэнне патрапіць не змог.

Супрацоўнік Адміністрацыі Ленінскага раёна Канстанцін Кісцянёў адмовіўся пусціць карэспандэнта ў залу. Журналіст напісаў скаргу ў Ленінскі РАУС, у якой папрасіў прыцягнуць чыноўніка да адміністрацыйнай адказнасці. Участковы Емельяненка пастанавіў спыніць справу за адсутнасцю складу правапарушэння.

Уладзімір Лапцэвіч не пагадзіўся з пастановай і звярнуўся са скаргай у суд Ленінскага раёна.

Суддзя В. Палякова прыняла довады журналіста і задаволіла яго скаргу.

Цяпер у дачыненні да чыноўніка Адміністрацыі Ленінскага раёна Канстанціна Кісцянева павінен пачацца новы адміністрацыйны працэс па справе аб яго самаўпраўстве.

Раней Уладзімір Лапцэвіч дамогся адмены яшчэ адной пастановы Ленінскага РАУС — таксама ў адносінах да Канстанціна Кісцянёва за адмову выдаць кнігу заўваг і прапаноў.