378

Суд не задаволіў іск доктара Юліі Рафаловіч супраць «раёнкі»

24.09.2021 Крыніца: Марат Гаравы / "Новы Час"

Суддзя Кобрынскага раённага суда Аляксей Кміта не задаволіў іск дзіцячага доктара Юліі Рафаловіч у абарону гонару, годнасці і дзелавой рэпутацыі.

Разгляд грамадзянскай справы Юліі Рафаловіч супраць рэдакцыі раённай газеты «Кобрынскі веснік» пачаўся 27 жніўня. Нагадаем, 21 красавіка на сайце vkobrine.by і 24 красавіка ў папяровым выданні быў апублікаваны артыкул «Калі забытая клятва Гіпакрата...».

Аўтар публікацыі паведаміў, што ўчастковая лекарка «з палітычных матываў наадрэз адмовілася... аказваць дапамогу дзіцяці супрацоўніка РАУС». Аднак праваахоўныя органы не знайшлі ў дзеяннях доктаркі складу злачынства, каб распачаць супраць яе крымінальную справу «па факце неаказання медычнай дапамогі хворай асобе без уважлівых прычынаў».

Іск педыятра да «раёнкі» разглядаўся ў закрытым судовым працэсе. Лекарку і яе адваката папярэдзілі аб крымінальнай адказнасці за разгалошванне даных судовага разбіральніцтва.

У інтэрв'ю «Новаму Часу» Юлія Рафаловіч заўважыла, што артыкул у «Кобрынскім весніку» выклікаў у яе абурэнне. «Менавіта так я рэагавала на абвінавачванне аўтара публікацыі, што ўбачыла лютага ворага ў хворым дзіцяці, якому была патрэбна тэрміновая медычная дапамога», — падкрэсліла спадарыня Юлія. На яе меркаванне, аўтар артыкулу грэбуе нормамі журналісцкай этыкі, калі так перакручвае той факт, што без талону на прыём яна адмовілася выдаць даведку аб стане здароўя дзіцяці для заняткаў у танцавальным гуртку.

Пасля адкрытага выступу Юліі Рафаловіч супраць фальсіфікацыі вынікаў прэзідэнцкіх выбараў і гвалту сілавікоў дзіцячая доктарка перажыла суды, штрафы, зняволенне, звальненне з працы і зневажальную публікацыя ў газеце. Апроч таго, пераслед спадарыні Юліі выявіўся пагрозамі завядзення на яе крымінальнай справы, праблемамі мужу на працы, адмовамі сыну, які вучыцца ў Польшчы, права перасекчы мяжу ды вярнуцца на радзіму. 10 жніўня 2020 года ў Кобрыне сын лекаркі быў затрыманы, збіты і асуджаны на 15 сутак.

Ва ўсіх гэтых захадах была праігнараваная 20-гадовая бездакорная праца Юліі Рафаловіч, партрэт якой упрыгожваў Дошку гонару лякарні, шчыры клопат педыятра пра маленькіх кобрынцаў у любы час сутак, а не толькі ў працоўны. Была пакінутая без увагі і просьба грамадскасці да галоўнага доктара бальніцы Міколы Брашко не звальняць шаноўную лекарку, хоць пад такім зваротам былі сабраныя больш за 800 подпісаў.

Самыя важныя навіны і матэрыялы ў нашым Тэлеграм-канале — падпісвайцеся!