247

Суд над Арцёмам Сізінцавым так і не скончаны. Працяг 24 верасня

16.09.2020 Крыніца: Служба маніторынгу ГА "Беларуская асацыяцыя журналістаў"

Незалежнага журналіста, які супрацоўнічае з “Беларускім Радыё Рацыя”, вінавацяць ва ўдзеле ў несанкцыянаванай акцыі паводле артыкула 23.34 КаАП. Арцёма Сізінцава затрымалі ў Мінску 6 верасня, хоць ён тлумачыў міліцыянтам, што не з’яўляецца ўдзельнікам маршу пратэсту, а выконвае свае прафесійныя абавязкі.

Тры дні яго трымалі за кратамі, і толькі 8 верасня прайшло першае судовае пасяджэнне — у ізалятары часовага ўтрымання ў Жодзіне, куды журналіста даставілі пасля затрымання. Справу журналіста разглядала суддзя Жодзінскага раённага суда Кацярына Якубіцкая, у выніку яна абвясціла перапынак у да 16 верасня. Справу перадалі суддзі Ганне Мукавозчык.

Сёння Арцём Сізінцаў і яго адвакат спрабавалі пераканаць суд у відавочным: журналіста, якія асвятляе пратэсты, нельга лічыць іх удзельнікам. Але і другая суддзя працэс не завершыла, а абвясціла перапынак. Яна вырашыла, што варта дачакацца сведкаў-міліцыянтаў, якія на суд не з’явіліся.

Працяг судовага пасяджэння прызначаны на 24 верасня.

На думку незалежнага журналіста, вялікага сэнсу ў гэтым няма: міліцыянты са схаванымі тварамі, якія пішуць пратаколы “пад капірку”, наўрад ці засведчаць, што бачылі ў ягонай асобе прадстаўніка СМІ.

Самыя важныя навіны і матэрыялы ў нашым Тэлеграм-канале — падпісвайцеся!