НЕ - ВАЙНЕ!
2496

Спыніла выхад недзяржаўная газета “Рэгіянальныя ведамасці”

11.01.2016 Крыніца: Служба маніторынгу ГА "Беларуская асацыяцыя журналістаў"

З 2016 года ў Магілёўскай вобласці больш не выходзіць газета “Рэгіянальныя ведамасці”. Пра гэта паведаміў у апошнім нумары “Рэгіянальных ведамасцяў” за 2015 год галоўны рэдактар газеты Юрый Камзолаў.

Спыненне выхаду “Рэгіянальных ведамасцяў” абумоўлена неплацяжамі з боку рэкламадаўцаў і цяжкім фінансавым становішчам выдання. “Пры немалых даўгах газеце за рэкламу сёння “Рэгіяналка” не ў стане стартаваць разам з вамі ў новы свой год”, – паведаміў у рэдактарскім артыкуле Юрый Камзолаў. Рэдактар падзякаваў чытачам за падтрымку і ўзгадаў аўтараў, якія на працягу многіх гадоў супрацоўнічалі з “Рэгіянальнымі ведамасцямі”.

Газета распаўсюджвалася на тэрыторыі г. Горкі і Горацкага раёна. Выданне выходзіла раз на тыдзень са жніўня 1999 года, асвятляла сацыяльна-эканамічнае і культурнае жыццё ў рэгіёне.

У 2004 годзе Міністэрства інфармацыі на тры месяцы прыпыняла дзейнасць ліцэнзіі на выданне “Рэгіянальных ведамасцяў” – у ведамстве палічылі, што тэматыка, тэрыторыя распаўсюду, перыядычнасць і мова выдання не адпавядалі заяўленым пры рэгістрацыі. Дэмакратычная грамадскасць Горак лічыла афіцыйныя прычыны прыпынення выдання газеты чыста фармальнымі і звязвала іх з крытычным стаўленнем рэдакцыі да сітуацыі ў краіне.

Пэўны час з “Рэгіянальнымі ведамасцямі” супрацоўнічаў вядомы горацкі журналіст Эдуард Брокараў, які пазней у 2009 годзе заснаваў абласную агульнапалітычную газету “УзГорак”.

Самыя важныя навіны і матэрыялы ў нашым Тэлеграм-канале — падпісвайцеся!