436

Развітанне з Валерам Шчукіным адбудзецца ў аўторак, 13 кастрычніка

10.10.2020 Крыніца: Прэс-служба ГА "Беларуская асацыяцыя журналістаў"

Развітанне з легендарным праваабаронцам і журналістам Валерам Шчукіным адбудзецца ў Мінску ў аўторак, 13 кастрычніка, а 14:00 у рытуальнай залі на вуліцы Альшэўскага, 12.

Родныя настойліва просяць усіх БЫЦЬ У МАСКАХ.​

Пахаваны Валер Шчукін будзе на Чыжоўскіх могілках.

Праваабаронца памёр у Мінску ў суботу, 10 кастрычніка.

Валер Шчукін скончыў Ленінградскую вышэйшую вайскова-марскую інжынерную вучэльню. 27 гадоў служыў у флоце. Капітан другога рангу. Па заканчэнні службы вярнуўся ў Мінск.

Дэпутат Вярхоўнага Савета XIII склікання. Ад 1996 па 2003 год жыў у Полацку.

Спадар Валер быў актыўным удзельнікам грамадска-палітычнага жыцця. Яго шмат разоў затрымлівала міліцыя, суды каралі яго штрафамі і арыштамі за ўдзел у апазіцыйных акцыях.

У 2001 годзе Шчукін адседзеў тры месяцы ў Жодзінскай турме за непадпарадкаванне ахоўнікам і пабітае шкло ў будынку Міністэрства ўнутраных спраў.

Сябра Беларускай асацыяцыі журналістаў, Беларускага Хельсінскага камітэта. Валер Шчукін да канца свайго жыцця займаўся праваабарончай дзейнасцю.

ГА “Беларуская асацыяцыя журналістаў” выказвае глыбокія спачуванні родным і блізкім Валерыя Шчукіна.

Самыя важныя навіны і матэрыялы ў нашым Тэлеграм-канале — падпісвайцеся!