271

Прысуд Марыне Золатавай і Людміле Чэкінай — помста прафесіяналам за праўду, якую TUT.BY даносіў да мільёнаў людзей. ЗАЯВА БАЖ

17.03.2023 Крыніца: БАЖ

Суддзя Валянціна Зянкевіч прызнала калег з TUT.BY вінаватымі і прызначыла вялізныя турэмныя тэрміны: галоўнай рэдактарцы найбуйнейшага беларускага інфармацыйнага партала  Марыне Золатавай — 12 гадоў пазбаўлення волі, дырэктарцы Людміле Чэкінай — 12 гадоў пазбаўлення волі.

Мінскі гарадскі суд за закрытымі дзвярыма разгледзеў крымінальную справу ў дачыненні галоўнай рэдактаркі найбуйнейшага беларускага інфармацыйнага партала TUT.BY Марыны Золатавай і дырэктаркі TUT.BY Людмілы Чэкінай.

Беларускія ўлады паспрабавалі разграміць партал TUT.BY 18 траўня 2021 года, калі ў рэдакцыі і ў кватэрах шэрагу супрацоўнікаў медыя сілавікі правялі ператрусы, пасля чаго затрымалі больш за паўтара дзясятка чалавек.

Да гэтага часу TUT.BY быў самым папулярным навінавым парталам у Беларусі і ахопліваў большую частку беларускага грамадства. Журналісты партала многія гады штодзённа паведамлялі навіны палітыкі, эканомікі, культуры, спорту і многіх іншых сфер.

Справа супраць TUT.BY і прысуд калегам — жорсткая помста за праўду, якую TUT.BY даносіў да мільёнаў людзей.

Улады традыцыйна вырашылі разбіць люстэрка, а не выпраўляць жахлівую беларускую рэчаіснасць, якая ў ім карэктна і прафесійна адлюстравана. Паказальна, што на месцы TUT.BY паўстаў новы медыяпраект «Зеркало» («Люстэрка»), які працянуў працу папярэднікаў, нягледзячы на рэпрэсіі.

Таксама 17 сакавіка была асуджаная да 10 гадоў пазбаўлення волі яшчэ адна прадастаўніца медыя — заснавальніца і шматгадовая рэдактарка сайта экспэртнай супольнасьці «Наше мнение» і ўкладальніца выдання «Белорусский ежегодник».

Сёння за кратамі знаходзіцца 36 медыяпрацаўнікоў. Па колькасці супрацоўніц медыя, які пазбаўленыя волі, згодна з Рэпарцёрамі без межаў, Беларусь знаходзіцца на трэцім месцы ў свеце.

Беларуская асацыяцыя журналістаў патрабуе адмены прысуду і неадкладнага вызвалення Марыны Золатавай, Людмілы Чэкінай і ўсіх прадстаўнікоў і прадстаўніц медыя, якіх на сёння трымаюць за кратамі.

Je suis TUT.BY!

Журналісты — не злачынцы!

Journalism is not a crime!

Самыя важныя навіны і матэрыялы ў нашым Тэлеграм-канале — падпісвайцеся!