Большасць беларускіх калег, нягледзячы на падзеі апошніх гадоў, застаюцца ў прафесіі. Пра гэта сведчаць вынікі нядаўняга апытання, якое праводзіла Беларуская асацыяцыя журналістаў.
БАЖ дзякуе ўсім, хто паспеў паўдзельнічаць у апытанні, якое скончылася роўна за дзень да таго, як арганізацыя займела «эктрэмісцкі» статус. Дарэчы, 86 % рэспандэнтаў абралі для адказаў беларускамоўную версію формы нашага апытання!
Многія адзначылі, што адчуваюць стомленасць ад дрэнных навін ці перажылі выгаранне. Тыя ж калегі, якія знаходзяцца ў эміграцыі, часцей спасылаліся на такія складанасці: немагчымасць сустракацца з роднымі і блізкімі, цяжкі псіхалагічны стан, вывучэнне замежнай мовы і пошук працы па прафесіі.
Паводле вынікаў, удзел у апытанні ўзялі ў асноўным калегі і каляжанкі, якія непасрэдна працуюць у медыя або медыясферы журналісцкіх ці рэдактарскіх пасадах.
Як вынікае з адказаў, БАЖ асацыюецца ў калег з прафсаюзам, свабодай слова, калегамі, маніторынгам парушэнняў правоў журналістаў і нават з офісам насупраць журфака БДУ.
Тры найбольш папулярныя адказы на пытанне, чаму чытаюць публікацыі, падрыхтаваныя БАЖ: «давяраю як незалежнай арганізацыі», «сачу за магчымасцямі (адукацыйныя, грантавыя і інш.)» і «адчуваю такім чынам, што я — частка супольнасці».
Найбольш цікавяць жа нашых чытачоў адукацыйныя магчымасці, практычныя парады і тое, як працуюць журналісты ў Беларусі і ў эміграцыі.
Звычайна за нашымі інфармацыйнымі матэрыяламі сочаць праз Telegram, дзякуючы рассылцы і на сайце БАЖ.
Найбольш важным родам дзейнасці асацыяцыі калегі лічаць адукацыйныя магчымасці для медыйшчыкаў, падтрымку журналістаў, асвятленне актуальнай інфармацыі медыярынку і маніторынг сітуацыі з парушэннем правоў супрацоўнікаў СМІ.