243 0

Перспектыва пайсці ў ІТ чакае многіх гуманітарыяў — прэс-тур БАЖ у ПВТ

06.12.2018 Крыніца: Прэс-служба ГА "Беларуская асацыяцыя журналістаў"

ГА «Беларуская асацыяцыя журналістаў» разам з Адукацыйным цэнтрам Парка высокіх тэхналогій у Мінску арганізавала прэс-тур для журналістаў. Супрацоўнікі медыя даведаліся пра адукацыйныя праграмы, паглядзелі, як знутры выглядае IT-індустрыя, што неверагодна хутка развіваецца ў Беларусі.

Апроч экскурсіі ў Адукацыйны цэнтр Парка высокіх тэхналогій, журналісты наведалі брыфінг у межах форума «Інфармацыйныя тэхналогіі ў адукацыі», арганізаваны Міністэрствам адукацыі Беларусі.

Як ІТ-індустрыя прадстаўленая ў медыя? Якія ўяўленні мае аўдыторыя пра «стандартнага айцішніка»? Ці ведаем мы, хто кіруе магутным бізнесам? Як ІТ-індустрыя зменіць рэгіёны ў бліжэйшы час?

На ўсе гэтыя пытанні ўдзельнікі прэс-тура спрабавалі знайсці адказы падчас брыфінгу з удзелам дырэктара Адукацыйнага цэнтра ПВТ у Гродна Кацярыны Радзюн, Яўгена Вайцяховіча — ён перакваліфікаваўся на Front-End распрацоўшчыка пасля працы на «БелАЗе», кіраўніка Аддзела па працы з кліентамі АЦ ПВТ Наталлі Хаханавай.

Намесніца дырэктара па навучальнай працы Дзіцячай акадэміі Адукацыйнага цэнтра ПВТ Ірына Васільева

 

Кацярына Радзюн, дырэктар філіяла Адукацыйнага цэнтра ПВТ ў Гродна, расказала пра тое як ІТ-індустрыя мяняе горад:

«У нас шмат групаў ІТ-спецыялістаў, якія збіраюцца па сваіх накірунках: бізнес-аналіз, JAVA-праграмаванне, тэсціроўшчыкі. Мінімум раз на месяц яны сустракаюцца, дзеляцца ведамі, плануюць удзел у канферэнцыях. ІТ-спецыялісты не прывязаныя да месца. Яны могуць жыць там, дзе ім камфортна. А калі добрую адукацыю і працу можна атрымаць у нас, то эміграваць не мае сэнсу».

Яўген Вайцяховіч, Жодзіна: «Самы першы сайт, які я «сабраў», каштаваў 25 долараў. Самы дарагі мой праект каштуе каля 7 тысяч долараў».

«Перад пачаткам навучання мы прапануем слухачам прайсці тэсты, якія выяўляюць наколькі ў чалавека ёсць схільнасці да канкрэтнага накірунка. Тэсты дапамагаюць выявіць ключавыя кампетэнцыі. Напрыклад, для тэсціроўшчыка гэта — увага, для праграміста — логіка. Таксама ёсць курсы, якія патрабуюць папярэдняй падрыхтоўкі, напрыклад, праграмаванне на JAVA ці Python. Тэсты паказваюць наколькі чалавек гатовы да курса, а калі бал нізкі, мы прапануем падрыхтоўчыя адукацыйныя праграмы», — распавяла начальнік аддзела па працы з кліентамі Адукацыйнага цэнтра Парка высокіх тэхналогій Наталля Хаханава.

Аміна Ідзігава

Аміна Ідзігава — вядомы ў Беларусі кансультант і HR-эксперт: «Цяпер у ІТ-індустрыі ў Беларусі працуе 30 тыс. чалавек. І яшчэ столькі ж мы гатовыя працаўладкаваць. Але іх няма дзе ўзяць».

Аміна па адукацыі журналістка, але сышла ў ІТ-індустрыю, і не шкадуе. Яна лічыць, што перспектыва «пайсці ў ІТ» чакае ў будучым многіх гуманітарыяў, тых, хто далёкі ад напісання кода.

Чаму?

Паводле Аміны, індустрыя ўсё больш патрабуе «людзей-гібрыдаў», якія здольныя спалучаць глабальнае бачанне, уменне вырашаць праблемы, асабістыя навыкі і прафесійныя кампетэнцыі.

«Сярод самых запатрабаваных навыкаў у ІТ сёння — здольнасць вырашаць праблемы, эфектыўна працаваць у камандзе, камунікатыўнасць, мець схільнасці да лідарства, аналітычныя здольнасці», — кажа HR-эксперт.

Важная заўвага:  фармальная адукацыя губляе сваю актуальнасць.

Як прыклад, такія вядомыя карпарацыі, як Google, Apple, IBM, E&Y і іншыя, ужо не пытаюцца ў сваіх будучых супрацоўнікаў дыплом.

Не мае значэння і ўзрост.

«Афіцыйны ўзрост «маладосці» працягнуты да 45 год. І ваш узрост ужо не мае значэння. Важна, што вы ўмееце», — кажа Аміна.

І гэта добрая навіна.

Яшчэ цытаты з прэзентацыі Аміны Індзігавай:

«Кар’ера згубіла лінейнасць. Нават калі вы не рухаецеся наперад, а інвестуеце ў сябе, у будучыні вас можа чакаць уздым».

«Да 2020 года кожны пяты супрацоўнік у ІТ-кампаніі будзе фрылансерам. Праца «на поўную стаўку» знікае».

«Адукацыя становіцца канструктарам з ведаў, якія чалавек можа перафарматаваць для сваіх патрэбаў».

«Галоўныя навыкі для ІТ сёння — умець чытаць (як ні дзіўна гэта гучыць), гугліць, ведаць англійскую мову, валодаць soft skills».

***

Аліна Скрабунова, Магілёў, журналіст-фрылансер: «Цяпер мне будзе не так страшна падыходзіць да тэмы ІТ. Я пабачыла, што там працуюць людзі, з якімі можна знайсці паразуменне. Яны могуць патлумачыць усё тымі ж словамі, якімі мы карыстаемся ў працы над іншымі тэмамі. Без паглыбленай тэрміналогіі». Матэрыял Аліны Скрабуновай ТУТ.

Базыль Матырка, вёска Слабодка, Лепельскі раён, Віцебская вобласць, карэспандэнт газеты «Лепельскі край»: «Я даведаўся, што ў папулярнай і прыбытковай сферы ІТ ёсць недахоп кадраў. Здавалася б, чэргі павінны стаяць! Цікава тое, што ёсць магчымасць для людзей з рэгіёнаў працаваць у такой сучаснай і мадэрновай галіне і не пераязджаць у сталіцу. З іншага боку, хацелася б яшчэ пачуць, як ІТ-індустрыя магла б быць задзейнічаная ў мясцовых рэгіянальных умовах».

Аляксей Харкевіч, Гомель, партал «Дзелавы Гомель»: «Было цікава ўбачыць, як дзеці навучаюцца на «Майнкрафце». Я не ведаў, што ў гульні можна практыкавацца распрацоўваць алгарытм».

ГА «БАЖ» разам з Адукацыйным цэнтрам ПВТ абвесціў конкурс на лепшую публікацыю па выніках прэс-тура. Пераможца зможа прайсці адукацыйны курс «Асновы вэб-тэхналогій».

Падзяку ў арганізацыі прэс-тура выказваем калектыву Адукацыйнага цэнтра Парка высокіх тэхналогій, маркетолагу Дзіяне Качатковай, намесніцы дырэктара Наталлі Цэлагуз, дырэктару Аддзела па працы з кліентамі Наталлі Хаханавай, намесніцы дырэктара па навучальнай працы Дзіцячай акадэміі Адукацыйнага цэнтра ПВТ Ірыне Васільевай.

Фота Таццяны Свірэпа