167

Пасля 45 сутак арышту на волю выйшаў блогер Алесь Круткін

13.03.2020 Крыніца: Служба маніторынгу ГА "Беларуская асацыяцыя журналістаў"

Блогер, паэт, актывіст кампаніі “Еўрапейская Беларусь” адбыў самы працяглы тэрмін за кратамі, калі казаць пра адміністрацыйныя пакаранні.

Першы раз Алеся Круткіна пакаралі адміністрацыйным арыштам на 15 сутак 28 студзеня ў Полацку за ўдзел у мінскіх акцыях супраць паглыбленай інтэграцыі, другі раз — 12 лютага суд Кастрычніцкага раёна Віцебска за налепку «Калгаснай дыктатуры баста!» на будынку абласной пракуратуры, трэці — Лепельскі райсуд 26 лютага за такую ж налепку на аўтобусным прапынку. Усе пакаранні прызначаныя Алесю Круткіну паводле арт. 23.34 КаАП РБ: нават расклейванне налепак суды кваліфікавалі як парушэнне заканадаўства аб масавых мерапрыемствах.

Сукупны тэрмін арышту Алеся Круткіна  аказаўся самым працяглым: большы прысудзілі хіба толькі блогеру Шэраму Кату — Дзмітрыю Казлову. Яму было прысуджана 120 сутак арышту агулам, але за кратамі ў аршанскім ІЧУ ён адбыў толькі 27 сутак.

Праваабаронцы звязваюць такі жорсткі пераслед блогера Круткіна з тым, што ён актыўна распаўсюджваў інфармацыю і рабіў абвесткі ў сацыяльных сетках пра вулічныя акцыі ў падтрымку суверынетэту Беларусі.

Пасля вызваленні з віцебскага ізалятара часовага ўтрымання 12 сакавіка Алесь Круткін распавёў сябрам, што ўмовы ўтрымання былі прымальныя: у камеры ён знаходзіўся пераважна адзін. А яшчэ за 45 сутак зняволення ён напісаў 56 вершаў. Цяпер блогер хоча пазнаёміць з імі чытачоў праз сацыяльныя сеткі, а потым, магчыма, выдаць асобным зборнікам.

Самыя важныя навіны і матэрыялы ў нашым Тэлеграм-канале — падпісвайцеся!