299

На Змітра Лупача склалі новы пратакол за працу без акрэдытацыі

11.02.2020 Крыніца: Служба маніторынгу ГА "Беларуская асацыяцыя журналістаў" Сюжэт: 22.9 КаАП

Змітра Лупача зноў выклікалі ў Глыбоцкі РАУС для складання новага пратакола паводле арт. 22.9 КаАП. Позву даслаў маёр міліцыі Сяргей Цырбан.

Справа ў тым, што 27 студзеня суд Глыбоцкага раёна, разгледзеўшы адміністрацыйную справу журналіста-фрылансера Змітра Лупача за супрацу з тэлеканалам “Белсат” без акрэдытацыі, вярнуў дакументы ў міліцыю на дапрацоўку. Паводле суддзі Станіслава Трапука, фактычную і канкрэтную дату інтэрв’ю, то бок адміністрацыйнага правапарушэння, немагчыма было дакладна вызначыць.

Цяпер міліцыянты склалі новы пратакол, у якім ужо фігуруе новая дата адміністрацыйнага правапарушэння. Да таго ж яны далучылі да справы яшчэ двух новых сведкаў, з якімі размаўляў журналіст падчас падрыхтоўкі відэасюжэту пра “праблемны” дом у гарадскім пасёлку Падсвілле.

Паводле слоў журналіста, маёр Сяргей Цырбан зазначыў яму, што справу ў міліцыі не зацягнуць, каб другое пасяджэнне суда адбылося своечасова і не скончыўся тэрмін прыцягнення да адказнасці па гэтай адміністрацыйнай справе.

Нагадаем, сёлета ў Змітра Лупача гэта ўжо другая па ліку адміністрацыйная справа за прафесійную дзейнасць. 10 студзеня суддзя Пастаўскага раённага суда Наталля Максімовіч пакарала журналіста штрафам паводле  арт. 22.9 КаАП за супрацу з тэлеканалам “Белсат”.

Самыя важныя навіны і матэрыялы ў нашым Тэлеграм-канале — падпісвайцеся!