729

На журналістку “Новага Часу” склалі пратакол за асвятленне акцыі каля пасольства Расіі

09.12.2018 Крыніца: Прэс-служба ГА "Беларуская асацыяцыя журналістаў"

Дзіяна Серадзюк прысутнічала на акцыі побач з пасольствам Расіі ў Мінску, бо рыхтавала матэрыял. Але ў міліцыі мяркуюць, што Дзіяна "ўстанавіла папяровы караблік побач з агароджай пасольства", то бок удзельнічала ў акцыі. 

Дзіяна Серадзюк

З Цэнтральнага РАУС Мінска Дзіяне Серадзюк прыйшоў пратакол: міліцыянты палічылі, што Дзіяна не асвятляла акцыю па ўскладанні караблікаў да Расійскай амбасады ў якасці журналіста, а прымала ў ёй удзел.

І тым самым парушыла арт.10 Закона "Аб масавых мерапрыемствах у РБ", парадак правядзення пікетавання, што выявілася ў прыняцці яе ўдзелу ў пікетаванні у складзе групы грамадзян без адпаведнага дазволу Мінгарвыканкама з мэтай публічнага выказвання сваiх адносiнаў да затрымання Расіяй ўкраінскіх ваенных караблёў у Керчанскім праліве, падчас якога ўстанавіла да агароджы будынка амбасады Расіі папяровы караблік з выявай ўкраінскага сцяга».

Дзіяна падкрэсліла, што на акцыі яна прысутнічала як журналіст: здымала ўдзельнікаў акцыі, апытвала іх. Да таго ж акцыю здымаў на відэа супрацоўнік міліцыі, і ўсё, што адбывалася побач з пасольствам, мусіць быць зафіксавана.

У пратаколе, які даслалі па пошце, указана, што Дзіяна Серадзюк не з'явілася ў міліцыю для апытання. Хаця, паводле слоў журналісткі, ніхто яе і не выклікаў.

Нагадаем, 25 лістапада на журналіста “НЧ” Мікалая Дзядка завялі адміністрацыйную справу за пост у Facebook. На яго складзены пратакол па ч. 2 артыкула 17.11 КаАП  за "дэманстрацыю нацысцкай сімволікі". Нагодаю стаў допіс у Facebook ў ліпені 2016 года — ілюстрацыя да паста, у якім Дзядок крытыкаваў людзей за тое што яны стаяць побач з нацыстамі.

Таксама супраць газеты “Новы Час” і журналіста Дзяніса Івашына пададзены чарговы судовы пазоў аб абароне гонару, годнасці і дзелавой рэпутацыі. Леанід Зайдэс, адзін з уласнікаў сумнавядомага рэстарацыйна-забаўляльнага комплексу “Поедем Поедим” (колішні «Бульбашъ-холл”), патрабуе спагнаць грашовую кампенсацыю маральнай шкоды ў памеры 8 000 рублёў.