2827

На сустрэчу з замежнымі журналістамі прыйшлі толькі Караткевіч і Улаховіч

10.10.2015 Крыніца: Прэс-служба ГА "Беларуская асацыяцыя журналістаў"

 

10 кастрычніка, за дзень да прэзідэнцкіх выбараў і ў апошні дзень перадвыбарнай агітацыі, у мінскім гатэлі “Еўропа” адбылася сустрэча беларускіх і замежных журналістаў з двума кандыдатамі на пасаду прэзідэнта.

Арганізатар мерапрыемства – “Прэс-клуб Беларусь” – анансаваў сустрэчу з трыма кандыдатамі, але Сяргей Гайдукевіч з нейкіх прычын не з’явіўся.

Журналістаў сабралася некалькі дзясяткаў, прычым не толькі замежных, але і беларускіх. Зала была амаль поўная.

Прысутныя Таццяна Караткевіч і Мікалай Улаховіч пасля кароткіх уступных прамоваў цягам гадзіны адказвалі на пытанні карэспандэнтаў.   

Першае ж пытанне тычылася Святланы Алексіевіч: журналістка нямецкага радыё спытала ў Караткевіч, наколькі важная для яе выказаная нядаўна нобелеўскай лаўрэаткай падтрымка. Стаўленнем абодвух кандыдатаў да пісьменніцы цікавіўся таксама журналіст са Швейцарыі.

Супрацоўніца іспанскай “El Pais” адрэагавала на рэпліку Мікалая Улаховіча пра неабходнасць узважыць, што беларусам больш патрэбна – “мова ці нармальнае жыццё”. “Няўжо немагчыма сумясціць?”, – задала журналістка рытарычнае пытанне.     

Польскае радыё пацікавілася, на колькі працэнтаў галасоў разлічвае кожны з кандыдатаў і ці вераць яны ў другі тур. Караткевіч адказала, што яе працэнт – “двухзначнае чысло”, і што ў выпадку празрыстасці працэдуры падліку галасоў быў бы другі тур. Улаховіч заявіў, што яго не цікавіць працэнт – яму важна, каб выбаршчыкі ўбачылі яго партыю. Некаторыя журналісты адрэагавалі на гэты адказ апладысментамі.

Калега з Фінляндыі хацела даведацца, якія асноўныя праблемы фармулявалі простыя людзі Таццяне Караткевіч у часе яе паездак па Беларусі.

Украінскі часопіс высвятляў, як ставяцца кандыдаты да падзеяў ва Украіне – не толькі да расійска-украінскага канфлікту, але і да самой змены ўлады, і як гэтыя падзеі ўплываюць на беларускую сітуацыю.

“СБ. Беларусь сегодня” спытала, каму кандыдаты ўдзячныя за свой сённяшні “аўтарытэт, якога дасягнулі”. Улаховіч аддаў даніну павагі СМІ: “Калі б не было шырокага інфармацыйнага поля, ніхто б пра нас не даведаўся”. Караткевіч таксама адзначыла працу масмедыя: “Адна з адметнасцяў гэтай кампаніі – тое, што дзяржаўныя медыя расказвалі пра нашы дзеянні і акцыі. Можа, не так актыўна, як незалежныя, але гэта добрая прыкмета – тое, што мы працавалі разам”.

“Еўрарадыё” пацікавілася, якім чынам кандыдаты збіраюцца “ісці да народу” пасля заканчэння выбараў, калі кандыдацкія прывілеі скончыцца. А таксама ці гатовыя яны да наступстваў, з якімі звычайна сутыкаюцца “альтэрнатыўныя” кандыдаты пасля выбараў.

Улаховіч параіў нікому не заракацца ад сумы і турмы, зазначыўшы, што, каб трапіць за краты, “не абавязкова быць палітзняволеным”. Караткевіч адзначыла, што і яе каманда, і многія іншыя людзі ў Беларусі рызыкуюць, але адчуваюць сябе гатовымі да ўсяго.

Істотна разняволіў атмасферу Васіль Сямашка з БелаПАН, які назваўся прэс-сакратаром ката Барсіка і спытаў у Мікалая Улаховіча, чаму ён часта згадвае гэтага “кандыдата” ў негатыўным святле. Прадстаўнік беларускага казацтва заявіў, што лічыць з’яўленне гэтага персанажа правакацыяй і здзекам з іншых удзельнікаў выбараў.

Пасля заканчэння сустрэчы з кандыдатамі ў журналістаў была магчымасць задаць пытанні экспертам – эканамісту Сяргею Чаламу і палітолагу Валеру Карбалевічу

Самыя важныя навіны і матэрыялы ў нашым Тэлеграм-канале — падпісвайцеся!