2401

МУС адказала на зварот БАЖ аб беспакаранасці злачынстваў супраць журналістаў

14.12.2011 Крыніца: Прэс-служба ГА "Беларуская асацыяцыя журналістаў" Сюжэт: Гучныя справы

Паводле ліста, міліцыя праводзіць «аператыўна-вышуковыя мерапрыемствы», каб высветліць абставіны знікнення Дзмітрыя Завадскага і забойства Веранікі Чаркасавай.

Сярод іншага ў адказе за подпісам часовага выканаўца абавязкаў міністра ўнутраных спраў палкоўніка міліцыі Алега Пякарскага адзначаецца, што аднаўленне расследавання згаданых БАЖ крымінальных спраў і правядзенне дадатковых праверак знаходзіцца ў кампетэнцыі Генеральнай пракуратуры.

Нагадаем, што на мінулым тыдні Генпракуратура даслала кіраўніцтву БАЖ кароткі адказ, паведаміўшы, што «…па двух выкладзеных у звароце фактах расследаваны крымінальныя справы, а па двух — праведзены праверкі з прыняццем рашэнняў аб адмове ва ўзбуджэнні крымінальнай справы».

Пры канцы лістапада БАЖ дасылаў у Генпракуратуру і МУС сваю заяву з патрабаваннямі аднавіць расследаванне крымінальных справаў па фактах забойства Дзмітрыя Завадскага і Веранікі Чаркасавай і даць іх сваякам, калегам і грамадству адказы на пытанні — хто забіў журналістаў і хто замовіў гэтыя злачынствы, а таксама правесці дадатковае празрыстае расследванне абставін смерці Алега Бябеніна і Васіля Гроднікава.