НЕ - ВАЙНЕ!
348

Мінінфарм аб’явіў чэмпіянат сярод журналістаў па… нарыхтоўцы дроў

27.10.2022 Крыніца: Служба маніторынгу Беларускай асацыяцыі журналістаў

Міністэрства інфармацыі распаўсюдзіла ў сваім тэлеграм-канале навіну з пазнакай «маланка» (не пашкадавалі ажно шэсць эмадзі!). Ведамства заклапацілася не пра лёс арыштаваных журналістаў ды знішчаныя медыі, а каб падначаленыя прапагандысты падхапілі «чэлендж» Лукашэнкі ў колцы дроў.

⚡️Внимание всем!
⚡️⚡️Впервые в Беларуси!
⚡️⚡️⚡️Организуется чемпионат среди белорусских журналистов и блогеров по колке дров! – на поўным сур’ёзе анансуе «ўнікальную акцыю» Мінінфарм.

Паўнамоцтвамі для арганізацыі «мерапрыемства дзяржаўнай важнасці» ўпаўнаважаны адмыслова створаны «аргкамітэт». А сама дзея пройдзе пад эгідай Мінскага аблвыканкама і абласнога лесагаспадарчага аб’яднання.

За адпраўны пункт бярэцца «майстар-клас», не так даўно прадэманстраваны Аляксандрам Лукашэнкам у пары з касцом, збіральнікам кавуноў, а цяпер яшчэ і ўдарным секачом драўляных цурак, бізнесменам Сяргеем Цяцерыным.

«Подхватывая эстафету президента, журналисты заявили, что хотят доказать: работать умеют не только словом. Наступает уникальная возможность продемонстрировать свои навыки! Чемпионат по колке дров даст возможность раскрыть рабочие таланты, выиграть хорошие призы, укрепить командный дух ваших редакций и просто прекрасно провести время на свежем воздухе», – канстатуюць у інфармацыйным ведамстве, якое дагэтуль яшчэ не размахвала сякерай.

Для патэнцыйных удзельнікаў «аргкамітэт» распрацаваў звод правіл і ўласную канцэпцыю. Натуральна, да ўдзелу ў спаборніцтвах дапускаюцца не ўсе ахвотныя, а толькі работнікі цэнтральных і рэгіянальных СМІ альбо блогеры, аб’яднаныя ў каманды. Згадалі і гендарную справядлівасць: жанчын мусіць быць мінімум дзве з сямі заяўленых удзельнікаў.

Сімвалічная і дата «чэмпіянату» – 7 лістапада, у так званы дзень кастрычніцкай рэвалюцыі, які на постсавецкай прасторы не адзначаюць нідзе, нават у Расіі.

Як рапартуюць арганізатары, у праграме тры віды спаборніцтваў: індывідуальная сечка дроў (асобна для мужчын і жанчын), распалавіньванне бервяна (толькі мужчыны) і камандная змяшаная эстафета.

Зрэшты, нават забаўна было б паназіраць, як увіхаюцца з «халоднай зброяй» штатныя прапагандысты рэжыму кшталту Рыгора Азаронка, Андрэя Мукавозчыка, Ксеніі Лебедзевай ці Людмілы Гладкай. Апантана вяшчаць – не трэскамі раскідвацца.

Сваю публічную дрованарыхтоўку Лукашэнка абставіў нібыта клопатам пра калектыўны Захад – маўляў, на фоне канфлікту з Расіяй і «Газпрамам» зімой «павымярзаюць цэлым гарадамі». Таму ў маналогу з Цяцерыным імправізаваў, як лепш даставіць дровы з Драздоў у Еўропу, каб тая потым узгадала пра «руку дапамогі». Пры гэтым удакладніў, што пажадана, каб ягоныя паленні дасталіся «звычайным грамадзянам», а не «бесталковым палітыкам».

Дзеля справядлівасці, склалася ўражанне, што і сам Лукашэнка так сабе настаўнік у гэтай справе – рассякаў сасновыя цуркі ў лепшым выпадку напалову. Адчуванне, што ў жылой рэзідэнцыі не сціплая печ, а прамысловая качагарка.

Колка дроў Лукашэнкам абрасла шматлікімі мемамі. Украінскі комік Юрый Вялікі па гарачых слядах нават зняў камедыйны ролік, які суправадзіў дасціпнай анатацыяй: «У Рыгоравіча вопыт у дровах вялізны – за сваю кадэнцыю «наламаў» ён іх нямала».

Чытайце яшчэ:

SEO на беларускай мове. Як прафесійным медыям выціснуць прапагандыстаў з топа Google і Яндэкс і зарабіць?

Журналіста Алеся Любенчука асудзілі на 3 гады пазбаўлення волі

Выкладчыкі ЕГУ знялі фільм пра Скарыну, які паказвае першадрукара ў іншым святле

Самыя важныя навіны і матэрыялы ў нашым Тэлеграм-канале — падпісвайцеся!