558

Мінінфарм абяцае адмяніць абавязковы 5-гадовы стаж для рэдактараў медыя

23.07.2018 Крыніца: ГА "Беларуская асацыяцыя журналістаў"

Пакуль, праўда, размова ідзе толькі пра сеткавыя выданні.

https://baj.by/sites/default/files/event/preview/zammin_informacii_20180302_bur_tutby_phsl_-5264.jpg

Міністэрства інфармацыі абяцае змяніць кваліфікацыйныя патрабаванні да галоўных рэдактараў сеткавых выданняў, магчымасць рэгістраваць якія з’явяцца неўзабаве ў абноўленым законе “Аб СМІ”.

— Кваліфікацыйныя патрабаванні былі распрацаваны даўно і тычацца ў першую чаргу друкаваных выданняў. Мы разумеем, што ў гэтым выпадку трэба быць больш гнуткімі, — заявіў агенцтву БЕЛТА першы намеснік міністра інфармацыі Беларусі Павел Лёгкі.

Сёння, паводле беларускага заканадаўства, пасаду рэдактара СМІ можа заняць толькі чалавек, які мае пяцігадовы стаж працы на кіруючых пасадах у медыя.

— Між тым кіраўнікі сеткавых рэсурсаў — гэта часта маладыя людзі. Фармальна вопыт работы ў іх невялікі, але па факце яны прафесіяналы ў сваёй справе, — гаворыць Павел Лёгкі.

У міністэрстве мяркуюць, што кваліфікацыйныя патрабаванні будуць змененыя пастановай Урада, якая выйдзе ў адпаведнасці з нядаўнімі зменамі заканадаўства. Такім жа чынам будзе вызначаны і парадак абавязковай ідэнтыфікацыі каментатараў на форумах.

Нагадаем, што папраўкі ў заканадаўства аб СМІ былі прынятыя беларускім парламентам у красавіку-траўні бягучага года і зараз праходзяць аналіз у Канстытуцыйным судзе, пасля чаго будуць падпісаныя Аляксандрам Лукашэнкам.

Прадстаўнікі медыясупольнасці неаднаразова звярталі ўвагу ўладаў на праблемныя нормы новага закона, у тым ліку на складаны парадак рэгістрацыі сеткавых выданняў.

Беларуская асацыяцыя журналістаў накіроўвала свае заўвагі ў Міністэрства інфармацыі і адпаведную камісію Палаты прадстаўнікоў, аднак амаль усе спрэчныя нормы ў дакуменце захаваліся. У законапраекце застаюцца абавязкі рэдакцый адсочваць змест каментароў, абавязковая ідэнтыфікацыя каментатараў у інтэрнэце і пазасудовыя магчымасці Міністэрства інфармацыі блакаваць інтэрнэт-рэсурсы.

 

Фота Дар'я Буракіна, TUT.BY