1314

Міліцыянты — журналісту «Бобруйского курьера»: Вас затрымалі, але не перашкаджалі працаваць

25.06.2017 Крыніца: Служба маніторынгу ГА "Беларуская асацыяцыя журналістаў"

Журналіст «Бобруйского курьера» Віктар Качан атрымаў адразу два адказы, «якія апраўдаюць» дзеянні міліцэйскага чыноўніка з УУС Бабруйскага гарвыканкама, што 23-га сакавіка 2017 г. затрымаў журналіста падчас выканання ім сваіх прафесійных абавязкаў.

У адказе, які прыйшоў з Бабруйскага міжраённага аддзела Следчага камітэта гаворыцца:

«Устаноўлена, што вашы заявы не ўтрымліваюць дастатковых дадзеных, якія паказваюць на прыкметы злачынстваў, прадугледжаных нормамі Крымінальнага кодэкса Рэспублікі Беларусь, а з'яўляюцца скаргай на дзеянні службовай асобы УУС Бабруйскага гарвыканкама, які ажыццяўляў прафілактычныя мерапрыемствы па папярэджанні здзяйснення адміністрацыйных правапарушэнняў, прадугледжаных арт. 23.34 КаАП Рэспублікі Беларусь, у сувязі з чым адсутнічаюць падставы для правядзення праверкі...»

У той жа бок і адказ, які прыйшоў праз дзень з УУС Бабруйскага гарвыканкама.

У ім сказана: «Падчас праверкі было ўстаноўлена, што начальнік аддзялення аховы правапарадку і прафілактыкі УУС Бабруйскага гарвыканкама падпалкоўнік міліцыі Рудзько С. В. вашай законнай прафесійнай дзейнасці не перашкодзіў і з яго боку адсутнічаюць супрацьпраўныя дзеянні».

У 2011 годзе Віктор Качан ўжо "трапляў у палон да праваахоўнікаў" — Віктар Качан на здымках фільма «Паляванне на гаўляйтара»

Артыкул 23.34 КаАП РБ, які пазначаны ў адказе са Следчага камітэта, прадугледжвае пакаранне за парушэнне ўстаноўленага парадку правядзення ці арганізацыі масавага мерапрыемства. Між тым закон «Аб СМІ» РБ надзяляе журналіста СМІ правам прысутнічаць на масавых мерапрыемствах і перадаваць адтуль інфармацыю.

У той жа час арт. 198 КК РБ устанаўлівае пакаранне на перашкода законнай прафесійнай дзейнасці журналіста, за ўціск яго правоў і законных інтарэсаў. Таму Віктар Качан і падаваў свае скаргі», – каментуе гэтыя падзеі службе маніторынгу БАЖ галоўны рэдактар «Бобруйского курьера» Анатоль Санаценка.

Цяпер журналіст «Бобруйского курьера» кансультуецца з юрыстамі БАЖ і плануе свае далейшыя прававыя дзеянні. Бо «праверачныя мерапрыемствы» праведзены Следчым камітэтам і УУС, відавочна, неаб'ектыўна, не былі дапытаныя сведкі па гэтай «справе» — тыя людзі, якіх міліцыя затрымала каля будынку Бабруйскага суда разам з Віктарам Качаном.

Нагадаем, 23-га сакавіка 2017 г. журналісты «Бобруйского курьера» Віктар Качан і Ганна Дусь па заданні рэдактара прыйшлі да будынка суда Бабруйскага раёна і г. Бабруйска, каб асвятліць працэс па справе грамадскай актывісткі, арганізатаркі пратэстных акцый Галіны Смірновай. Але былі затрыманыя падпалкоўнікам міліцыі Сяргеем Рудзько і дастаўлены ў бабруйскую пракуратуру для «прафілактычнай гутаркі».

Віктар Качан адразу ж падаў заяву ў пракуратуру (у якой і знаходзіўся) на незаконнае затрыманне і парушэнні яго правоў як журналіста. Гэтую заяву пракуратура пераправіла ў мясцовы Следчы камітэт.

У пачатку красавіка журналіст «БК» атрымаў адтуль «здзеклівы адказ» і абскардзіў яго ў вышэйстаячых структурах гэтага ведамства. У выніку Следчы камітэт вырашыў правесці дадатковую праверку па заяве.