588

Магілёўскія журналісты адмовіліся ехаць у Горкі з-за пагрозы каранавіруса

10.04.2020 Крыніца: Служба маніторынгу ГА "Беларуская асацыяцыя журналістаў" Сюжэт: COVID-19

Магілёўскія журналісты-фрылансеры Дар’я Чульцова і Міхаіл Аршынскі адмовіліся наведаць Горацкі раённы аддзел унутраных спраў з-за небеспякі, якая існуе ў сувязі з распаўсюдам каранавіруснай інфекцыі ў Беларусі.

Позвы з патрабаваннем з’явіцца 9 красавіка а 10-й гадзіне раніцы ў Горацкі РАУС Міхаілу Аршынскаму і Дар’і Чульцовай супрацоўнікі міліцыі ўручылі перад пачаткам разгляду справы Міхаіла Аршынскага ў Кастрычніцкім судзе Магілёва 27 сакавіка.

Чульцова і Аршынскі мяркуюць, што супрацоўнікі Горацкага РАУС хочуць іх пабачыць, каб правесці апытанне і скласці пратаколы аб адміністрацыйным правапарушэнні за рэпартаж, які з’явіўся на тэлеканале “Белсат” на пачатку сакавіка. У ім распавядалася пра дрэнны стан дарогі ў вёсцы Стан Горацкага раёна.

Абмеркаваўшылі сітуацыю, журналісты вырашылі, што ехаць у Горкі небяспечна, бо цяпер у Магілёўскай вобласці  распаўсюджваецца каранавірусная інфекцыя. І Дар’я Чульцова, і Міхаіл Аршынскі накіравалі адпаведныя лісты з тлумачэннем сваёй пазіцыі ў Горацкі РАУС.

Журналісты напісалі, што яны не супраць пагутарыць з горацкімі міліцыянтамі, калі тыя створаць бяспечныя для іх здароўя ўмовы, паездка ж у Горкі грамадскім транспартам не можа гэта гарантаваць.

У адказ журналісты атрымалі sms-паведамленні з Горацкага РАУС, што ўказаныя імі аргументы не з’яўляюцца паважлівай прычынай.

Міхаіл Аршынскі распавёў карэспандэнту службы маніторынгу ГА “БАЖ”, што пасля атрымання паведамлення ён звязаўся па тэлефоне з начальнікам ААПП Горацкага РАУС Аляксандрам Баршчэўскім, каб асабіста давесці сваю пазіцыю. Аргументы журналіста на супрацоўніка міліцыі асаблівага ўражання не зрабілі.

Паводле слоў Аршынскага, ён дрэнна сябе адчувае і ў яго ёсць на гэты конт адпаведная медыцынская даведка. Журналіст лічыць, што калі супрацоўнікам горацкай міліцыі сапраўды так патрэбны іх тлумачэнні, яны заўсёды могуць атрымаць іх у Магілёве.

Самыя важныя навіны і матэрыялы ў нашым Тэлеграм-канале — падпісвайцеся!