НЕ - ВАЙНЕ!
931

Магілёўскі ваенкамат вырашыў не прызываць журналіста Буракова ў войска?

25.05.2016 Крыніца: Служба маніторынгу ГА "Беларуская асацыяцыя журналістаў"

24 мая журналіст Аляксандр Буракоў разам са сваім прадстаўніком, праваабаронцам Барысам Бухелем перадалі ў Магілёўскі ваенкамат заяву аб прыпыненні рашэння прызыўной камісіі наконт адпраўкі журналіста ў войска 26 мая.

Напярэдадні, 23 мая, Буракоў накіраваў скаргу на рашэнні прызыўных камісій Магілёва і Магілёўскай вобласці ў суд Ленінскага раёна Магілёва. Паводле арт. 37 Закона “Аб усеагульным воінскім абавязку і вайсковай службе” рашэнне прызыўной камісіі Магілёўскай вобласці пра яго прызыў павінна быць прыпынена да ўступлення рашэння суда ў законную сілу.

У ваенкамаце пісьмовую заяву Буракова прыняў і зарэгістраваў маёр Баразноў А. А. Паводле журналіста, ён выйшаў кудысьці для кансультацый на 20 хвілін, а пасля вяртання аб’явіў, што рашэнне пра прызыў Буракова на вайсковую службу 26 мая ануляванае. Яму выпісалі новую позву на 30 мая, аднак не для адпраўкі ў войска, а для ўдакладнення звестак. Не выключана, што ў гэтую прызыўную кампанію Буракова прызываць у армію ўжо не будуць.

Аляксандр Буракоў не пагаджаецца з рашэннем Магілёскіх гарадской і абласной прызыўных камісій пра сваю “прыдатнасць з абмежаваннямі” да вайсковай службы – ён мае захворванне каленных суставаў, пры якім прадугледана вызваленне ад вайсковай службы ў мірны час.

Магілёўскія праваабаронцы таксама лічаць, што паводле медыцынскіх паказчыкаў і афіцыйных патрабаванняў да прызыўнікоў, Буракоў не служыць у войску ў мірны час. Барыс Бухель мяркуе, што ўлады выкарыстоўваюць прызыўную кампанію як інструмент палітычнага ціску, бо хочуць ізаляваць напярэдадні выбарчай кампаніі аднаго з нешматлікіх незалежных журналістаў Магілёва.

Аляксандр Буракоў раней быў рэдактарам папулярнага магілёўскага анлайн-часопіса Moloko. Журналіст піша шмат матэрыялаў на праваабарончыя тэмы пра падзеі ў Магілёве і Магілёўскай вобласці.

Незалежны журналіст з Магілёва абскарджвае рашэнні прызыўных камісій праз суд

Самыя важныя навіны і матэрыялы ў нашым Тэлеграм-канале — падпісвайцеся!