206

Лукашэнка сказаў расійскім СМІ, каб не плявузгалі. А беларусаў, што хайпуюць на каранавірусе, «трэба ставіць на месца»

13.04.2020 Крыніца: Nn.by Сюжэт: COVID-19

Аляксандр Лукашэнка папракнуў расійскія СМІ ў прадузятым асвятленні захадаў, якія робяцца ў Беларусі па барацьбе з каранавірусам. Пра гэта ён заявіў сёння на нарадзе ў Мінску, паведамляе БелТА.

«Хацеў бы яшчэ раз закрануць пытанне СМІ. Нядрэнна пачалі працаваць нарэшце і беларускія СМІ. Я ўчора глядзеў выніковыя праграмы па ўсіх каналах. Вельмі аб'ёмна. Нават ва Уладзіміра Сцяпанавіча (Караніка) забралі працу. Ужо так патлумачылі ўсё і пра маскі, і пра бахілы, і лячэнне, што толькі сядзі дома і лячыся, — сказаў кіраўнік дзяржавы. — Мне шмат кажуць, што мы там прайграем тэлеграм-каналам ды іншае. Так, напэўна, там бруду больш, чым нашых галасоў — афіцыйных уладаў. Хоць інфармацыі не скажаш, што не хапае. Але я так падумаў, ну што нам, піярыцца і пачаць ствараць нейкія тэлеграм-каналы і там нейкую пажаўцелую інфармацыю укідваць, каб там прысутнічаць… Напэўна, гэта не наш шлях».

Аляксандр Лукашэнка падкрэсліў, што для тых, хто хоча пачуць прафесійны пункт гледжання, інфармацыі дастаткова: «Кожны дзень мы, нічога не хаваючы, выдаем у эфір. Выступаюць медыкі, спецыялісты, прафесіяналы. Дайшлі да таго, што ўжо дактары-пульманолагі выступаюць».

Разам з гэтым ён у негатыўным ключы выказаўся пра тое, як асвятляюць падзеі ў Беларусі ў расійскіх медыя, прытым не толькі ў ананімных тэлеграм-каналах, але і ў агульнарасійскіх СМІ. «Даюць такую ​​агідную інфармацыю. А, бацька там лечыць сваіх трактарам, гарэлкай, лазняй… Ведаеце, калісьці я на хаду пажартаваў. Але ў кожным жарце ёсць доля жарту», — заўважыў кіраўнік дзяржавы.

«Расіянам хацеў бы сказаць — гэтым, якія «плявузгаюць»: не чапайце нас! Мы ж у іх нічога не просім. Мы ратуемся, абараняемся самі. Прыязджайце да нас, паглядзіце самастойна. Але навошта ж вы нас у Расіі робіце дурнямі? Навошта рускаму чалавеку забіваць у галаву, што там, на Захадзе, нашы гэтыя беларусы, яны нейкія ненармальныя?» — паставіў пытанне Аляксандр Лукашэнка.

«Прытым тут ужо не адбрыкаешся, што гэта некіравальныя каналы. Вось мне нядаўна паказалі ў чарговы раз нейкага Кляймёнава [вядучы «Першага канала» — НН], які там на Расію выдаваў, што ў нас і захворванні, і хаваюць інфармацыю… Ну і нашы пачалі падхапляць. Мы запрасілі Сусветную арганізацыю аховы здароўя. А слабо ўсім паклікаць спецыялістаў у краіну? Расіянаў, амерыканцаў (ад сусветнай арганізацыі). І вось так бы мовіць: ідзіце і паглядзіце, як у нас яны былі. І што яны (СААЗ) сказалі — прэтэнзій да беларусаў няма», — падкрэсліў кіраўнік дзяржавы.

«Так, ёсць рэкамендацыі: не хадзіце натоўпамі, не трыціся адно аб аднаго, не цалуйцеся, не абдымайцеся і іншае. Мы ўспрымаем гэтыя рэкамендацыі. Але што мы робім няправільна і дзе мы хлусілі? Публічна сказалі, што ні Міністэрства аховы здароўя, ні ўлады тут не хлусілі. Мы адкрытыя — прыходзьце і глядзіце. Мы робім гэта для сваіх людзей. Але расіяне нам не чужыя. Мы гатовыя з імі мець зносіны, раіцца», — заявіў Аляксандр Лукашэнка.

Ён адзначыў, што калі ў Расіі сапраўды хочуць як-небудзь дапамагчы Беларусі, то маглі б знізіць да сусветнай цану на прыродны газ: «Калі хочаце дапамагчы, зрабіце нам сусветную цану па прыродным газе. Сёння ў Еўропе прыродны газ Расія прадае па $80, не вышэй за $90 за 1 тыс. куб. м. А мы плацім $127. Дзе такая цана сёння ёсць? Вось хочаце дапамагчы, дапамажыце. Ні грошай, нічога не просім. Навошта з нас шкуру драць?»

«Але пра гэта ў Расіі ніхто не скажа. Гэтая праўда камусьці там не патрэбна. Здагадайцеся з трох разоў каму. Таму яшчэ раз паўтараю: вы нас не чапайце! Скончыцца гэта ўсё, потым мы паглядзім, хто мае рацыю, а хто не», — дадаў беларускі лідар.

Аляксандр Лукашэнка таксама нагадаў кіраўніку Адміністрацыі Прэзідэнта пра задачу спыняць у Беларусі ўсякія спробы хайпаваць на тэме каранавіруса.

«І сваіх трэба кантраляваць. І Камітэту дзяржбяспекі больш жорстка тут, і міліцыі, і Мінінфарм няхай глядзіць за ўсімі. Калі пабывалі тут міжнародныя эксперты, іх паменшыла — такіх смелых, якія хайпавалі ў інтэрнэце на гэтай бядзе. Але яшчэ яны ёсць. Іх трэба ставіць на месца. І не баяцца, што нас абвінавацяць у нейкай недэмакратычнасці. Пройдзе гэта ўсё, і мы паглядзім, хто нагнятаў псіхоз», — сказаў ён.

Ён адзначыў, што ёсць у свеце СМІ і палітыкі, якія хайпуюць на гэтай тэме, і папярэдзіў, што ў Беларусі так не робяць. «Мы гэта не рабілі. І я вас заўсёды папярэджваў, што не трэба гэтага рабіць. Таму што потым сорамна будзе сваім людзям глядзець у вочы. Палітыка, якая зыходзіць ад зямлі, ад людзей, і мы гэтай палітыкі павінны прытрымлівацца, — заявіў кіраўнік дзяржавы. — Мы выпрацавалі сваю тактыку барацьбы з гэтымі інфекцыйнымі захворваннямі. Мы, не разваліўшы сістэму, маем інфекцыйныя бальніцы ад раёнаў да Мінска, навукова-практычныя цэнтры. Яны абсталяваныя. Гэта нас сёння ратуе».

«Давайце будзем спакойна жыць, займацца сваёй справай, выхоўваць дзяцей і думаць пра будучыню. А мы зробім усё дзеля таго, каб кожны чалавек захаваў сваё жыццё. Асабліва цяпер, каб даказаць, што мы можам змагацца за чалавека і перамагаць гэтую заразу. Як я сказаў, прыгожа перамагаць», — падкрэсліў Аляксандр Лукашэнка.

Ён дадаў, што ў ліку пытанняў, якія абмяркоўваюцца на нарадзе, не толькі пытанні, звязаныя з хваробамі, але і перспектыўныя тэмы, якія трэба вырашаць. Акрамя таго, у краіне набірае абароты пасяўная кампанія. «Людзі працуюць так, як трэба. Малайцы. Але, тым не менш, мы павінны бачыць перспектывы, што будзе заўтра-паслязаўтра, калі гэта ўсё скончыцца», — рэзюмаваў Лукашэнка.

Журналісты недзяржаўных СМІ: Ёсць устаноўкі найперш даваць інфармацыю дзяржаўным медыя

Власти вынесли предупреждение сайту «Медиа-Полесье». Редакция: ответ на письменный запрос мы не получили до сих пор

БАЖ обратился в прокуратуру и просит прекратить административный процесс против «Медиа-Полесья»

Самыя важныя навіны і матэрыялы ў нашым Тэлеграм-канале — падпісвайцеся!