2578

КДБ паведаміў пра затрыманне злачыннай групы, якая тры гады праслухоўвала журналістаў

29.10.2015 Крыніца: Прэс-служба ГА "Беларуская асацыяцыя журналістаў"

 

29 кастрычніка прэс-служба Камітэта дзяржаўнай бяспекі распаўсюдзіла паведамленне пра спецаперацыю, у выніку якой была “спынена супрацьпраўная дзейнасць злачыннай групы, дзеянні якой груба парушалі канстытуцыйныя правы грамадзян Рэспублікі Беларусь”.

“На працягу трох гадоў удзельнікі злачыннай групы ажыццяўлялі дзейнасць па праслухоўванні памяшканняў, тэлефонных перамоваў, узломе электроннай пошты, акаўнтаў Skype, Viber, WhatsApp, сацыяльных сетак”, – гаворыцца ў паведамленні.

Ахвярамі групоўкі сталі больш за дзве тысячы грамадзян Беларусі, у тым ліку «журналісты дзяржаўных і недзяржаўных СМІ». Прэс-служба не ўдакладняе, якіх менавіта.

«Праведзена больш за 80 ператрусаў. Устаноўлена каля паўтара тысяч замоўцаў незаконных паслуг, – паведамляе ведамства. – Выяўлена і канфіскавана спецыяльнае электроннае абсталяванне, наяўная замежная валюта. Да затрыманых прыменена мера стрымання ў выглядзе заключэння пад варту… У дачыненні да ўдзельнікаў групы распачата крымінальная справа па прыкметах злачынства, прадугледжанага ч.2 ст.376 КК Рэспублікі Беларусь (незаконныя выраб, набыццё або збыт сродкаў для сакрэтнага атрымання інфармацыі, учыненыя групай асоб па папярэдняй змове). Артыкул прадугледжвае пазбаўленне волі тэрмінам да 4 гадоў».

Што да замоўцаў, то ў іх дзеяннях «угледжваюцца прыкметы складу злачынства, прадугледжанага ст.203 КК Рэспублікі Беларусь (парушэнне таямніцы перапіскі, тэлефонных ці іншых перамоваў, паштовых, тэлеграфных ці іншых паведамленняў)». Па гэтым артыкуле заведзена больш за 20 крымінальных спраў.

КДБ праводзіць «неабходныя аператыўна-вышуковыя мерапрыемствы і следчыя дзеянні, накіраваныя на выяўленне і дакументаванне іншых эпізодаў супрацьпраўнай дзейнасці падазраваных, а таксама ўсталяванне ўсіх кліентаў злачыннай групы, і асобаў, якія пацярпелі ад іх дзеянняў».

КДБ: Калі да вас не прыйшлі і не канфіскавалі тэхніку, то вас не праслухоўвалі

Банда хакераў ці канкурэнты КДБ?

Самыя важныя навіны і матэрыялы ў нашым Тэлеграм-канале — падпісвайцеся!