1813 0

«Ідэальны рэпарцёр». Навучальны курс для журналістаў (да 22 сакавіка ўключна)

02.03.2016 Крыніца: Прэс-служба ГА "Беларуская асацыяцыя журналістаў"

26.03.2016 — 29.05.2016, Мінск-Вільня.

Рэпартаж — самы старажытны і яскравы інфармацыйны жанр журналістыкі. Ён не толькі інфармуе, але і паказвае, як усё адбывалася, дазваляе патрапіць туды, куды звычайнаму чалавеку ўваход забаронены — вось чаму нават у эру высокіх тэхналогій рэпартаж не надакучвае аўдыторыі.

Многія лічаць яго жанрам «з характарам». І маюць рацыю.

Рэпартаж не даруе памылак — мы навучым вас пралічваць сітуацыю з прафесійнага пункту гледжання і дапаможам здабыць практычны досвед па напісанні розных відаў рэпартажу. 

Акцэнт робіцца на «навучанне дзеяннем» з практыкаваннямі і заданнямі. Працаваць давядзецца як індывідуальна, так і ў камандзе.

Пасля заканчэння курсу слухачы будуць ведаць:

— якія прафесійныя стандарты падрыхтоўкі розных відаў рэпартажу;

— які від рэпартажу і ў якіх канкрэтных умовах выбраць;

— якія правілы збору інфармацыі без рызыкі для жыцця падчас падрыхтоўкі рэпартажу з «гарачай кропкі»;

— якія метады работы і этычныя стандарты падчас падрыхтоўкі ролевага і свецкага рэпартажу;

— якія эканамічныя падзеі патрабуюць рэпарцёрскіх падыходаў, і як падрыхтаваць класічны рэпартаж на эканамічную тэматыку;

— што такое «жывая» інтэрнэт-трансляцыя і якія анлайн-сервісы дапамагаюць у працы над ёй;

— якія стандарты рэпартажных здымкаў і асноўныя памылкі рэпарцёраў.

Пасля заканчэння курсу слухачы будуць умець:

— выкарыстоўваць метады збору інфармацыі для ролевага і свецкага рэпартажу;

— выконваць стандарты напісання эканамічнага рэпартажу;

— арганізоўваць і праводзіць анлайн-рэпартаж;

— выкарыстоўваць анлайн-сэрвісы падчас падрыхтоўкі і правядзення анлайн-рэпартажаў.

Да ўдзелу запрашаюцца: Журналісты, выпускнікі факультэтаў журналістыкі альбо школ маладога журналіста, а таксама студэнты, якія ўжо маюць досвед напісання рэпартажаў, але зацікаўленыя ў самаўдасканаленні, з Мінска і рэгіёнаў.

Лепшыя з навучэнцаў па выніках курсу атрымаюць магчымасць удзелу ў семінары за мяжой.

Апісанне курсу:

Курс «Ідэальны рэпарцёр» распачнецца 26 сакавіка 2016 года і скончыцца 29 мая 2016 года.

Складаецца з васьмі заняткаў і майстар-класу замежнага трэнера. Заняткі будуць праводзіцца раз на тыдзень па суботах з 15.00 да 18.00.

Заяўкі на ўдзел у навучальным курсе “Ідэальны рэпарцёр” прымаюцца ад сябраў ГА “Беларуская асацыяцыя журналістаў” па электроннай пошце на адрас: baj@baj.by (з пазнакай «Reporting») да 22 САКАВІКА ЎКЛЮЧНА.

Ваша заяўка павінна ўтрымліваць:

1. Кароткі расповед пра сябе (не больш за 1 000 знакаў).

2. Абгрунтаванне свайго жадання ўдзельнічаць у курсе.

Колькасць удзельнікаў абмежаваная!

Каментары