1725

Гомельская міліцыя не падзяляе занепакоенасці ГА “БАЖ” лёсам фрылансераў

21.01.2016 Крыніца: Прэс-служба ГА "Беларуская асацыяцыя журналістаў" Сюжэт: 22.9 КаАП

Аддзелы ўнутраных спраў (АУС) Гомельскага і Калінкавіцкага райвыканкамаў адпісаліся на звароты журналісцкай арганізацыі датычна пераследу фрылансераў. З адказаў вынікае, што міліцыя не збіраецца “садзейнічаць спыненню неабгрунтаванага ўмяшальніцтва” сваіх супрацоўнікаў у працу журналістаў.

6 студзеня ГА “БАЖ” пісьмова звярнулася да начальнікаў Гомельскага і Калінкавіцкага АУС – тых, чые супрацоўнікі складалі пратаколы на аштрафаваных пазней журналістаў Кастуся Жукоўскага і Ларысу Шчыракову.

Арганізацыя выказвала занепакоенасць у сувязі з аднаўленнем пераследу журналістаў і заклікала міліцэйскае начальства садзейнічаць спыненню такой практыкі з боку сваіх падначаленых.

Да пасланняў было прыкладзена падрыхтаванае юрыстамі ГА “БАЖ” Абгрунтаванне неправамернасці прыцягнення да адказнасці журналістаў-фрылансераў за супрацоўніцтва з замежнымі СМІ.

Часовы выканаўца абавязкаў начальніка аддзела Калінкавіцкага АУС Аляксандр Сівак паінфармаваў, што зварот БАЖ фактычна дублюе скаргу самога Жукоўскага, якую накіравалі ў суд разам з яго справай.

А начальнік АУС Гомельскага райвыканкама Васіль Краўцоў паведаміў толькі, што “для абскарджання прынятага рашэння па ч.2 арт. 22.9 КаАП… неабходна звяртацца ў суд Гомельскага раёна”.

Нагадаем, што адначасова ГА “БАЖ” напісала і ў Адміністрацыю Прэзідэнта, заклікаючы “садзейнічаць спыненню неабгрунтаванага ўмяшання супрацоўнікаў органаў унутраных спраў у права журналістаў на свабоднае атрыманне, захаванне і распаўсюд інфармацыі, свабоду выказвання меркаванняў і перакананняў, гарантаваныя артыкуламі 33 і 34 Канстытуцыі Беларусі”.

Адказу ад гэтага ведамства пакуль няма. Між тым, суды над журналістамі-фрылансерамі працягваюцца.

ГА “БАЖ” звярнулася ў Адміністрацыю Прэзідэнта з нагоды пераследу журналістаў-фрылансераў

Абгрунтаванне неправамернасці прыцягнення да адказнасці журналістаў-фрылансераў за супрацоўніцтва з замежнымі СМІ