369

Глеб Лабадзенка зладзіў першую прэзентацыю непадцэнзурнай Геніюш у Беларусі

20.02.2019 Крыніца: Служба маніторынгу ГА "Беларуская асацыяцыя журналістаў"

Журналіст, сябра ГА “БАЖ” Глеб Лабадзенка прэзентаваў у Гродне першае непадцэнзурнае выданне вершаў і лістоў беларускай паэткі Ларысы Геніюш.

У новай кнізе “Унукам” прадстаўленыя больш за 50 вершаў Геніюш, якія друкуюцца ўпершыню. А вершы, па якіх за савецкім часам прайшліся нажніцы цэнзара, зараз дзякуючы намаганням Лабадзенкі можна прачытаць у арыгінальным выглядзе.

“Вершы, што выходзілі раней, удалося “адмыць” ад цэнзуры. Здавалася, дзіцячыя вершы — што там правіць? Але жорстка правілі, скарачалі ў разы, разбуралі рытм і рыфму. І гэта першая кніга, калі дзіцячыя вершы Ларысы Антонаўны ў поўным аб’ёме, як яна іх пісала, убачыла свет без цэнзуры”, — кажа пра кнігу журналіст Глеб Лабадзенка.

Журналіст упэўнены, што ўсе творы беларускіх паэтаў і пісьменнікаў, выдадзеныя пры СССР, трэба спраўджаць на з тым, як яны былі напісаныя першапачаткова:

— Вельмі часта гэта была бяздарная рэдактура, вершы скарачалі ў пяць разоў. Дарэчы, апынулася, што абедзве кнігі Геніюш, надрукаваныя за савецкім часам, рэдагаваў дзіцячы паэт Авер’ян Дзеружынскі. Жонка Рыгора Барадуліна, якая працавала разам з ім у выдавецтве, лічыла, што рабіў ён гэтак, бо зайздросціў таленту Геніюш. Гэта так і выглядае”, — адзначыў на сустрэчы Лабадзенка.  

Для журналіста гэта быў першы досвед працы ў архіве бібліятэкі Акадэміі навук Беларусі, дзе існуе адмысловы фонд Ларысы Геніюш, які налічвае ў сабе больш за тысячу тэчак з дакументамі.

У працы над кнігай Глебу Лабадзенку дапамагаў унук паэткі Міхась Геніюш, які стала жыве ў Польшчы. Менавіта яму і яго брату Алесю былі каля паўстагоддзя таму адрасаваныя тыя дзіцячыя вершы, што сталі асновай кнігі “Унукам”.

Міхась Геніюш таксама прыехаў на гродзенскую прэзентацыю.

“Пра вельмі многія вершы Ларысы Геніюш, якія выдаваліся за савецкім часам, можна сказаць, што яны былі яе і не яе адначасова. Яны называліся так, як яна іх назвала, а выглядалі іначай. Мая бабуля часам смяялася, часам злавалася з гэтага. Вельмі Ларыса Геніюш не любіла, калі нехта рабіў карэктуру, бо у яе вершах быў спецыфічны рытм, а пры карэктуры ён губляўся. Часам губляўся і сэнс. І я вырашыў, што дзіцячыя кнігі Геніюш трэба паказаць дзецям яшчэ раз – без цэнзуры”, — зазначыў унук знакамітай беларускай паэткі на сустрэчы з гродзенцамі.

Прэзентацыя кнігі “Унукам” адбылася 16 лютага ў гродзенскім Цэнтры гарадскога жыцця.

Глеб Лабадзенка паказаў таксама гродзенцам дакументальны фільм пра лёс Ларысы Геніюш “Непахісныя” і прэзентаваў непадцэнзурнае выданне кнігі Якуба Коласа “Сымон-музыка”, да стварэння якой журналіст таксама мае дачыненне.

 Фота Аляксандра Саенкі