377 0

Гендырэктарка БелТА: Мы змянялі паролі. Але якая розніца?

07.08.2018 Крыніца: Анастасія Бойка, "Еўрарадыё"

Гендырэктарка БелТА Ірына Акуловіч распавяла "Еўрарадыё", чаму звярнулася ў міліцыю з заявай, вынікам якой сталі вобшукі ў рэдакцыях TUT.by і БелаПАН, і затрыманні рэдактараў і журналістаў. Па яе словах, інфармагенцтва атрымала заявы ад некаторых арганізацый, якія плацяць за падпіску на БелТА, пра тое, што яны маюць складанасці з аўтарызацыяй.

Фота: sb.by

“На навіны БелТА падпісаныя больш за 30 рэсурсаў, я іх ведаю. Ёсць тыя, якія не падпісваліся, але пад чужымі паролямі падключаліся да стужкі і атрымлівалі інфармацыю. Натуральна, самі мы не маглі разабрацца, хто гэта робіць. Таму мы напісалі заяву ў міліцыю для таго, каб яны разабраліся”.

Па словах Акуловіч, ні ў TUT.BY, ні ў БелаПАН падпіскі на платную стужку навін агенцтва не было.

“Я на гэтай пасадзе працую нядаўна, таму не магу вам дакладна сказаць, ці была гэта падпіска раней. Але, па-мойму, не было”, — кажа Акуловіч.

Таксама гендырэктарка БелТА распавядае, што паролі перыядычна змяняліся. Але яна не лічыць гэта важным: “Калі ёсць пароль, нават калі ён змяняецца, выкарыстоўваеце вы першы пароль ці другі — ад гэтага змяняецца сутнасць рэчаў?”.

БелТА збіраецца давесці справу да суда.

7 жніўня ў офісе TUT.BY і БелаПАН праходзяць вобшукі. Журналістаў не пускаюць у рэдакцыі. Затрыманыя галоўная рэдактарка TUT.BY Марыну Золатава і рэдактарка навінаў Ганна Калтыгіна, журналістка БелаПАН Таццяна Каравянкова. Іх падазраюць у неправамерным карыстанні платнай падпіскай дзяржаўнага інфармагенцтва БелТА.

Крымінальную справу распачалі па частцы 2 артыкула 349 КК Беларусі — "Несанкцыянаваны доступ да камп’ютарнай інфармацыі, здзейснены з іншай асабістай зацікаўленасці, які пацягнуў прычыненне істотнай шкоды". Санкцыі па гэтым артыкуле — штраф, або пазбаўленне права займаць пэўныя пасады або займацца пэўнай дзейнасцю, або арышт, або абмежаванне волі на тэрмін да двух гадоў, або пазбаўленне волі на той жа тэрмін.

Каментары