295

Фотакарэспандэнтам Васюковічу і Грыдзіну прысудзілі па 11 сутак арышту за несанкцыянаваную акцыю

16.09.2020 Крыніца: Алесь Пілецкі, svaboda.org

У судзе Фрунзэнскага раёну Менску 17 верасьня ўзнавіліся адміністрацыйныя працэсы над фотакарэспандэнтамі Аляксандрам Васюковічам, Уладзем Грыдзіным і іхным сябрам Ягорам Калягіным, якіх затрымалі ўвечары 13 верасьня ў менскім бары «1067». Іх вінавацяць у парушэньні парадку арганізацыі і правядзеньня масавых мерапрыемстваў.

Уладзь Грыдзін знаходзіцца ў ізалятары на Акрэсьціна. Ён удзельнічаў у судзе праз скайп. 15 верасьня

Учора суд адправіў справы ўсіх трох на дапрацоўку. Абвінавачаньне ня здолела даказаць, што Васюковіч, Грыдзін і Калягін удзельнічалі ў несанкцыянаванай акцыі на вуліцы Раманаўскай Слабадзе — ўжо пасьля завяршэньня пратэставага «Маршу герояў». Сёньня міліцыя прадставіла цалкам пераробленыя пратаколы. Зь іх вынікае, што фотакарэспандэнты і іх сябар «мітынгавалі» зусім у іншым месцы і ў іншы час — на вуліцы Прытыцкага, 21, з 19:00 да 19:05.

17.19 Суд прызнаў вінаватымі Аляксандра Васюковіча і Ўладзя Грыдзіна ў парушэньні парадка арганізацыі і правядзеньня масавых мерапрыемстваў. Кожнаму зь іх прысудзілі па 11 сутак арышту. Яны знаходзяцца за кратамі зь вечара 13 верасьня. ​

15.37 Разгляд справы Васюковіча скончаны. Суддзя выйшаў для прыняцьця рашэньня. Да гэтага ў працэсе паглядзелі відэа, дзе бачна, што журналіст менавіта працуе каля станцыі мэтро «Пушкінскай». Таксама вывучылі рэдакцыйнае заданьне газеты «Новы час». Адвакат выступіла з прамовай, дзе падрабязна патлумачыла неабходнасьць закрыць справу, паведаляе БАЖ.

15.12 У судзе над Васюковічам дапытваюць фотажурналістку Tut.by Вольгу Шукайла, паведамляе БАЖ. «Бачыла журналіста падчас працы. Ён быў абазначаны, меў пасьведчаньне. Разам са мной здымаў акцыю, мы працавалі побач. Васюковіч нічога не крычаў, ня меў ніякай сымболікі. Пасьля інцыдэнту з журналістамі БелаПАН, „КП“ і Tut.by два тыдні таму, фатографы наогул імкнуцца не размаўляць з удзельнікамі акцыі».

Васюковіч сядзіць у калідоры на Акрэсьціна, побач зь ім размаўляюць і ходзяць супрацоўнікі міліцыі. На скайп часта тэлефануе нехта іншы. Усё гэта чутно ў судзе.

14.54 Пачаўся разгляд справы Ўладзя Грыдзіна. Як і ў выпадку Васюковіча, пратакол Грыдзіна міліцыя перапісала. Паводле новай версіі сілавікоў, ёнмітынгаваў не на Раманаўскай Слабадзе, а ў раёне вуліцы Прытыцкага 21.

14.44 Аднавіўся разгляд справы Аляксандра Васюковіча. Паводле перапрацаванага пратаколу, 13 верасьня ён браў удзел у несанкцыянаваным мітынгу на вуліцы Прытыцкага 21, у раёне 19.00. У пратаколе аб адміністратыўным парушэньні гаворыцца, што Васюковіч зь ім ня згодны. Ён кажа, што на месцы правядзеньня мітынгу працаваў як журналіст.

14.09 Ягору Калягіну, якога затрымалі разам з Грыдзіным і Васюковічам, прысудзілі штраф 540 рублёў.

Аляксандар Васюковіч выступае на судзе праз скайп, 15 верасьня

Аляксандар Васюковіч выступае на судзе праз скайп, 15 верасьня

* * *

Вядомых у Беларусі і ў сьвеце фотакарэспандэнтаў Уладзя Грыдзіна і Аляксандра Васюковіча затрымалі 14 верасьня а 21-й гадзіне ў менскім бары «1067» разам зь сябрам Ягорам Калягіным.

Васюковіч сядзеў у бары разам з Грыдзіным і Калягіным, расказала Свабодзе іх суседка па століку Жанна. Пасьля таго як мужчыны выйшлі пакурыць і вярнуліся ў бар, па іх зайшлі 6–7 чалавек у балаклавах. Мужчын затрымалі і забралі іхнае абсталяваньне. Імёны іншых затрыманых пакуль невядомыя. З запісаў камэраў назіраньня было відаць, што некаторыя сілавікі былі ў форме АМАПУ.

Журналістаў даставілі ў Фрунзэнскае РУУС, адкуль іх пасьля перавезьлі ў ізалятар на Акрэсьціна.

Грыдзін быў фотакарэспандэнтам Радыё Свабода, пакуль 29 жніўня ўлады не пазбавілі яго і яшчэ трох журналістаў рэдакцыі акрэдытацыі. Апошні час супрацоўнічаў з парталам Tut.by. Уладзь быў пераможцам і прызэрам конкурсу Belarus Press Photo, яго здымкі публікавалі сусьветныя агенцтвы і СМІ 

У канцы ліпеня звыш 200 журналістаў зьвярталіся да ўладаў і сілавікоў у справе гвалту супраць журналістаў і перашкодаў у працы:

«У Крымінальным кодэксе Беларусі ёсьць артыкул 198: „Перашкода законнай прафэсійнай дзейнасьці журналіста... караецца штрафам, або пазбаўленьнем права займаць пэўныя пасады, або займацца пэўнай дзейнасьцю, або абмежаваньнем волі на тэрмін да трох гадоў, або пазбаўленьнем волі на той жа тэрмін“».

 

Самыя важныя навіны і матэрыялы ў нашым Тэлеграм-канале — падпісвайцеся!