413

Да адміністратара Telegram-канала “Мосты для жизни” прыйшлі супрацоўнікі міліцыі

16.07.2020 Крыніца: Служба маніторынгу ГА "Беларуская асацыяцыя журналістаў"

Супрацоўнікі Мастоўскага РАУС 15 ліпеня правялі агляд жылля ў аднаго з адміністратараў Telegram-канала “Мосты для жизни” Аляксандра Мілюка.  У выніку следчых дзеянняў міліцыянты забралі ў яго мабільны тэлефон.

Аляксандр Мілюк / фота harodniaspring.org

Паводле Мілюка, агляд яго дома, які знаходзіцца ў вёсцы Вялікія Сцепанішкі Мастоўскага раёна, праваахоўнікі праводзілі ў межах праверкі па крымінальнай справе за публічную абразу прадстаўніка ўлады (арт. 369 КК РБ).

Пастанову на агляд “з мэтай выяўлення матэрыяльных аб’ектаў, якія маюць значэнне для справы”, падпісаў пракурор Мастоўскага раёна Міхаіл Разуваеў.

Падставай для правядзення следчых дзеянняў сталі накіраваныя 6 ліпеня ў райаддзел Следчага камітэта заявы двух супрацоўнікаў міліцыі: намесніка начальніка Мастоўскага РАУС Аляксея Літаша і начальніка аддзела аховы правапарадку і прафілактыкі гэтага ж райаддзела Яўгена Кудрашова.

Міліцыянты заяўляюць, што Мілюк нібыта 3 ліпеня змясціў у Telegram-канале “Мосты для жизни” відэа, у якім публічна выказвае ў дачыненні да іх некарэктныя выразы з-за распачатай на яго адміністрацыйнай справы за дробнае хуліганства. І патрабуюць прыцягнуць яго да адказнасці за знявагу гонару і асабістай годнасці як супрацоўнікаў органаў унутраных справаў.

Характэрна, што ў гэтым Telegram-канале на ўказаную заяўнікамі дату відэа адсутнічаюць.

У выніку правядзенага агляду супрацоўнікі міліцыі вынялі ў Аляксандра Мілюка мабільны тэлефон. Таксама стала вядома, што адміністрацыйную справу ў дачыненні да яго прыпынілі.

Аляксандр Мілюк — шматдзетны бацька, гадуе траіх дзяцей. Апроч адміністравання Telegram-канала таксама з’яўляецца чальцом ініцыятыўнай групы кандыдата на пасаду прэзідэнта Святланы Ціханоўскай.

Самыя важныя навіны і матэрыялы ў нашым Тэлеграм-канале — падпісвайцеся!