299

Чарговы штраф за распаўсюд незарэгістраванай газеты ў Магілёве. Ужо па абноўленым артыкуле КаАП

04.03.2021 Крыніца: Служба маніторынгу ГА "Беларуская асацыяцыя журналістаў"

Суд Ленінскага раёна Магілёва 4 сакавіка пакараў штрафам у памеры 870 рублёў жыхара Магілёва Сяргея Тамукевіча. Суддзя Аксана Ратнікава прызнала яго вінаватым у распаўсюдзе незарэгістраванай газеты “Могилевские вести”.

Згодна з матэрыяламі справы,  Сяргей Тамукевіч на пачатку студзеня перавозіў на сваім аўтамабілі тысячу асобнікаў самвыдатаўскай газеты, у якой асвятляліся грамадска-палітычныя падзеі ў краіне. У магілёўца таксама адабралі аўтамабіль у якасці рэчавага доказу.

Адміністрацыйны працэс над Тамукевічам пачаўся яшчэ тады, калі дзейнічала ранейшая рэдакцыя Кодэкса аб адміністрацыйных правапарушэннях. У студзені супрацоўнікі Ленінскага РАУС абвінавацілі яго ў парушэнні ч. 2 арт. 22.9 з той жа дыспазіцыяй, якая з 1 сакавіка 2021 года адпавядае ч. 3 арт. 23.5 КаАП.

Суддзя Ратнікава пагадзілася з міліцэйскім пратаколам і аштрафавала абвінавачанага на 30 базавых велічынь (870 рублёў) паводле ч. 3 арт. 23.5 КаАП. Аўтамабіль павінен быць вернуты Тамукевічу з моманту ўступлення рашэння суда ў законную сілу.

Сяргей Тамукевіч пакуль не вырашыў, ці будзе абскарджваць пастанову суда.

Нагадаем, што ў гэтым годзе ў судах Магілёва за распаўсюд самвыдатаўскай газеты “Могилевские вести” ўжо было пакарана некалькі чалавек (паводле звестак праваабаронцаў — пяць).

Таксама на пачатку лютага з’явілася інфармацыя, што магілёўскія праваахоўнікі затрымалі восем чалавек за незаконны выраб і распаўсюд друкаванай прадукцыі.

Згодна інфармацыі магілёўскай міліцыі, у дачыненні да ўсіх затрыманых былі складзеныя пратаколы, некаторых ужо прыцягнулі да адміністрацыйнай адказнасці ў выглядзе буйных штрафаў, астатнія чакаюць рашэння суда. На адабраную ў іх маёмасць накладзены арышт да выплаты штрафаў.

Адну з жанчын, якую раней аштрафавалі за незаконны выраб і распаўсюд прадукцыі СМІ, цяпер затрымалі па падазрэнні ў дачыненні да вырабу і размяшчэння на пуцеправодах “цынічна падпісаных лялек з асобамі чыноўнікаў”.

Самыя важныя навіны і матэрыялы ў нашым Тэлеграм-канале — падпісвайцеся!