775

БТ не адпусціла мядзведзіка Топу на анлайн-канферэнцыю на Baj.by

21.06.2016 Крыніца: Прэс-служба ГА "Беларуская асацыяцыя журналістаў"

Белтэлерадыёкампанія не зацікаўленая ва ўдзеле мядзведзіка Топы ў анлайн-канферэнцыі на сайце ГА “Беларуская асацыяцыя журналістаў”.

Пра гэта паведаміла прэс-сакратар Белтэлерадыёкампаніі Святлана Смалонская. Па яе словах, на БТ прааналізавалі тое, як праходзяць анлайн-канферэнцыі на сайце Baj.by, і прынялі рашэнне не адпраўляць героя “Калыханкі” на такое мерапрыемства.

Прэс-служба ГА “БАЖ” звярталася ў Белтэлерадыёкампанію з просьбай адпусціць мядзведзіка Топу на адну з анлайн-канферэнцый. Нагадаем, сёлета «Прыз глядацкіх сімпатый» на «Тэлевяршыні» атрымаў мядзведзік Топа (акцёр Уладзімір Варанкоў) з «Калыханкі». У сацыяльных сетках разгарнулася актыўная кампанія ў яго падтрымку, што дазволіла дзіцячаму герою перамагчы ў рэспубліканскім конкурсе.

Нягледзячы на адмову, прэс-служба ГА “БАЖ” заяўляе, што па-ранейшаму чакае да сябе Топу ў любы зручны для мядзведзіка час. З гэтай нагоды кіраўніцтва арганізацыі мяркуе нават закупіць некалькі кілаграмаў мёду для найбольш камфортнай размовы.

Нагадаем, што ў пятніцу а 12-й гадзіне ўдзел у анлайн-відэаканферэнцыі на сайце Baj.by возьме журналіст “Еўрапейскага радыё для Беларусі” Зміцер Лукашук.

Анлайн-канферэнцыя са Змітром Лукашуком. Пятніца, 12:00. Не прапусціце!

Самыя важныя навіны і матэрыялы ў нашым Тэлеграм-канале — падпісвайцеся!